Wara waqfa ftit u xejn twila li ħaditni lura lejn pajjiż twelidi, inħoss li għandi nkompli nwassal l-aħbarijiet mill-komunità Maltija fl-Awstralja. Wara l-Konvenzjoni għal Maltin ta’ Barra li saret fil-Belt Valletta f’Marzu 2010 deher iktar ċar minn qatt qabel li għandna nżommu dan il-pont bejnietna miftuħ beraħ.
 
Indunajt ukoll kemm hemm faqar fil-medja miktuba ta’ Malta fejn jindaħlu l-aħbarijiet mill-Awstralja. Mhux faċli li tifhem għaliex meta tinduna kemm hemm għatx u entużjażmu kull meta tkellem lin-nies dwar il-Maltin fl-Awstralja.
 
Il-Konvenzjoni 2010 li organizza b’tant ħerqa u entużjażmu l- Ministeru ta’ l-Affarijiet Barranin ġabret flimkien għadd kbir ta’ Maltin li jgħixu barra li ħassew li kien id-dmir tagħhom li jmorru Malta biex jaqsmu fehmithom dwar id-diffikultajiet u l- aspirazzjonijiet ta’ dawk li b’kuraġġ kbir u determinazzjoni ħallew djul ommhom biex fittxew artijiet oħra li offrewlhom futur jekk mhux aħjar iżda bla ebda dubju differenti u ta’ sfida.
 
Fl-opinjoni tiegħi nħoss li l-Konvenzjoni 2010 serviet ta’ ġid iżda kien ikun ferm iktar aħjar kieku kien hemm ferm inqas kontroll minn naħa tal-Gvern Malti. Dejjem xtaqt li wara l-ewwel żewġ Konvenzjonijiet jiġifieri dawk li saru fl-1969 u l-2000 ikollna Konvenzjoni li tkun immexxija mill-Maltin ta’ Barra għall-Maltin ta’ Barra.

Għal darba oħra dan ma seħħx u għalija personali din kienet ta’ diżappuntament. Ġiet mogħtija mportanza eseġerata lill- Ministri, Segretarji Parlamentarji u persuni oħra li jgħixu Malta fejn ħafna drabi dawn ħadu ħafna ħin f’diskorsi fit-tul biex imbagħad ftit kellna ħin biex nanaliżżjaw u niddiskutu b’ serjetà dak li l-Maltin ta’ Barra kellhom xi jgħidu fil-ħafna diskorsi li ġew ippreparati.
 
Kemm-il darba talbuni l-kummenti tiegħi dwar il-Konvenzjoni 2010. Kienet suċċess? Jien ngħid li s-suċċess veru ta’ din il- Konvenzjoni jrid titqies biss minn kif u meta jiġu mwettqa l- wegħdiet li sarulna.
 
Għad ikolli iktar xi ngħid dwar dak li sar fil-Konvenzjoni 2010. Nixtieq, iżda li sinċerament nirringrazzja lill-organizzaturi li għamlu l-almu tagħhom kollu biex kollox jimxi b’mod organizzattiv u skond il-programm li fasslu l-istess organizzaturi.
 
Lil Prof Joe Pirotta li mexxa s-sezzjonijiet skond il-programm imfassal b’direzzjoni li dejjem kienet fid-dritt u sinċiera, lil Ambaxxatur Salvu Stellini u dawk kollha tal-Ministeru li ma setgħux jagħmlu iktar għalina d-delegati speċjalment lil Angel Azzopardi u Joanna Pisani li tant kienu familjari mad-difetti tagħna.

Kemm domt Malta u speċjalment tul il-Konvenzjoni sirt naf li kien hemm ferm iktar determinazzjoni biex jiġu jarawna fl- Awstralja milli biex jiġu solvuti d-diversi proposti li għamilnielhom. Tant hu hekk li dis-sena jew kmieni fl-2011 se jkollna diversi żjarat importanti minn nies ta’ stoffa. Se jkollna li Dr Joseph Muscat, il-Kap ta’ l-Oppożizzjoni, u d-delegazzjoni tiegħu. Wara mistennija l-Ministru Dolores Cristina. Diġà bdew preparamenti wkoll biex jiġi jarana l-President tar-Repubblika George Abela li fi tfulitu għamel xi żmien emigrat f’Melbourne.
 
Nixtieq nieħu din l-opportunità biex għan-nom tal-Maltin li jgħixu fl-Awstralja nixtiequlu fejqan malajr wara l-inċident li ġralu fi-Ċina biex ikompli bil-missjoni tiegħu ta’ sliem u għaqda sinċiera fost il-poplu Malti.

Iż-żjara tal-kap ġdid tal-Partit Laburista hija mistennija b’ħerqa kbira fost il-Maltin ta’ l-Awstralja. Dan il-mexxej żagħżugħ kellu opportunitajiet diversi li jiltaqa’ mad-delegati li attendew il- Konvenzjoni u ma hemmx dubju li wera ħerqa sinċiera li l-Partit tiegħu jrid iżomm kuntatt sħiħ mal-Maltin ta’ Barra. Għad mhux ċert min se jakkumpanja lid-delegazzjoni Laburista iżda barra mill-mexxej mistenni jiġu jżurna wkoll Dr George Vella u Dr Charles Buhagiar flimkien ma’ Michelle, il-mara ta’ Dr Muscat u t-tfal tewmin tagħhom.
 
Iż-żjara ta’ Dr Muscat se testendi għal bliet ta’ Sydney, Canberra, Adelaide u Melbourne u se ddum mill-20 sat-30 ta’ Mejju. . Bħas-soltu d-delegazzjoni Laburista se tiġi meħuda f’ħafna  postijiet importanti (ċentri, każini etċ) u mistennija li se