|
 Il-lejla
6 ta' Settembru 2006, fis-Sala Robert Sammut
il-Furjana saret tifkira mistħoqqa lil kbir għannej,
Frans Baldacchino, il-Budaj. Din is-serata ġiet
organizzata mid-Dipartiment ta' l-Edukazzjoni,
Żgħażagħ u Xogħol u taħt l-awspiċi
tal-Ministru Louis Galea.
Wara introduzzjoni ta' Charles Coleiro, intwera
video qasir fuq il-Budaj, l-Etnika daqqet ftit
mużika li fiha nstemgħa wkoll il-leħen tal-Budaj.
Ir-Reverendu Professur Peter Serracino Inglott,
tkellem fuq Frans b'affezzjoni kbira u semma' meta
Frans kien mar jgħanni fl-Università' ta' Malta.
Wara kien hemm għana mill-għannejja Fredu Abela, "iż-Żejtuni"
u Fredu Grima "tal-Marsa", akkompanjati
mill-kitarristi "Fredrick Mallia "ir-Re"" (Prim),
Salvu Tanti "l-Kanadiż" u Raymond Schembri
"Iċ-Ċiranu".
Stephanie Farrugia qrat xi poeżiji li kienu ġew
miktuba mill-Budaj, l-Etnika reġgħet daqqet melodija
tradizzjonali Maltija, ġew murija video clips oħra
tal-Budaj u l-Ministru Louis Galea għamel diskors
qasir bħala konklużjoni.
Preżenti għal din is-serata kien hemm Pawla
Baldacchino, il-mara ta' Frans, u xi membri oħra tal-familja tiegħu kif ukoll għannejja u kitarristi oħra u
folla sabiħa li attendiet.
Kienu siegħa u nofs ta' tifħir lil wieħed li
jixraqlu l-għaliex offra ħafna lill-Għana u
l-Kultura Maltija.
|
