Fir-Rabat:

It-Tabella fir-Rabat

Din it-tabella li kienet imwaħħla fit-toroq tar-Rabat Malta ħassejt li fiha tifsira. Nistaqsi: Kien hemm għalfejn il-Kunsill Lokali tar-Rabat iwaħħal tabella bħal din biex jgħidilna li l-proġett li wettaq kien frott il-għaqal u s-serjetà fit-tmexxija? Forsi qabel dan, l-għaqal u s-serjetà ma tantx kienet hemm? Il-Kunsill jidher ukoll li jrid jagħmilha ċara li dan il-proġett ġie mħallas minnu u mhux minn xi ħaddieħor jiġifieri mill-Gvern ċentrali. Għalija, dawn huma affarijiet strambi jew b’riħa politika.

 Ix-xatt tas-Sliema:

Il-pjazza Sant Anna tas-Sliema, fejn kien hemm il-Magic Kiosk

Kont f’tas-Sliema meta fetħu l-pjazza Sant Anna ix-Xatt. Din il-pjazza ma hiex ikbar minn xi bitħa ta’ dar fl-Awstralja iżda ċ-ċerimonja tal-ftuħ tant ġiet mogħtija importanza li sa anke fetaħha l-Prim Ministru nnifsu, sintendi mal-MPs tal-post. Kien hemm kant, żfin, maġija, insomma l-organizzaturi ħasbu li se jiftħu xi Opera House ġdida. Sa kien hemm ikel u xorb għal kulħadd. In-nies jidher li japprezzaw dawn l-eseġerazzjonijiet għax kien hemm mijiet preżenti u allura dak li sar forsi kien ġustifikat. Jien puntwali u wasalt hemm kif qaluli iżda l-ftuħ sar sagħtejn wara. Meta tħares lejn l-istat diżastruż li jinsab fih ix-xatt ta’ Sliema kien ikun ferm aħjar kieku dan il-post tant prominenti mat-turisti ġie rranġat milli din il-pjazza (fejn kien hemm il-popolari Magic Kiosk) ġiet mogħtija dik il-prominenza kollha.

 L-Għarix: 

L-Għarix f'Dellimara

Jien mhux xi wieħed minn dawn li kont mitluf wara l-Perit Duminku Mintoff iżda nħoss li dan il-politiku Malti għandu post kemm fil-folklor u anke l-istorja politika ta’ Malta kif għandhom politiċi oħra ta’ l-istess statura tiegħu. Ħafna jiftakru l-kontroversja li nqalet fil-każ tal-post li kellhu bħala villeġġatura f’Delimara meta quddiemu sewwa nbniet il-Power Station. L-Għarix għadu hemm, kif jidher f’dan ir-ritratt, post ta’ ħafna memorji. Żaruh ħafna nies ta’ stoffa mhux biss Maltin iżda ukoll barranin. L-istorja ma għandu jagħwiġha ħadd. Dan il-post għandu jiġi ppreservat forsi wkoll isir mużew ta’ l-istorja politika. F’pajjiżi oħra tħallas il-flus biex tmur tara djar ta’ l-artisti u nies prominenti. “L-Għarix” kif qiegħed maqtugħ għalih u mdawwar bl-għelieqi huma idejali bħala post li jista’ jiġi rreklamat mad-dilettanti ta’ l-istorja politika.

 Id-Dragonara:

Il-Casino -Dragonara Palace

Il-Casino ta’ Malta jinsab f’post storiku u prestiġjuż fil-ponta tad-Dragonara. Il-liġijiet ta’ Malta għadhom jitolbu li kull min jidħol f’dan il-post tal-logħob anke jekk tkun trid tmur tiekol trid tirreġistra billi turi karta ta’ l-identità’ jew passaport. Ħadt pjaċir li dawn ir-regulament josservahom strettament u ma’ kulħadd tant li fil-grupp li konna meta morna biex nieklu żammew milli jidħlu żewġ persuni li ma kellhomx magħhom xi karti ta’ l-identità. Kieku r-regoli f’Malta jiġu osservati b’tant ħerqa u mingħajr distinzjoni kullimkien imorru ferm aħjar. Ma nistax nifhem għaliex għandek tiġi fotografat u ddentifikat biex tidħol f’Casino. F’pajjiżi bħall-Awstralja, il-Kanada u l-Amerika tista’ taqbad u tidħol. Forsi Malta hemm iktar ħasil ta’ flus minn dak li jsir f’dawk il-pajjiżi li semmejt?

 Id-dwejra:

Id-Dwejra, Għawdex

Wieħed mill-postijiet li nħobb inżur hu d-Dwejra f’Għawdex iżda kull darba li nasal sa hemm inħoss għafsa ta’ qalb. It-telqa li hemm u l-mod bla grazzja li dan il-post hu miżmum hu ta’ għajb għal dawn li jridu jippromovu t-turiżmu f’Għawdex. Il-bini nofsu mitluq, fejn tipparkja kollu trab u passaġġi kollha ħofor u perikolużi sa kemm tinżel minn fuq sad-daħla fejn hemm id-dgħajjes itellfuk miż-sbuħija naturali tal-post. Man-niżla beda tiela’ bini tal-konkos u ħadid (mhux ġebla Maltija tafux) li ma jaqbel xejn ma’ l-ambjent. Għawdex irid xi ħadd b’viżjoni biex dawn il-postijiet ma jkomplux jiddiżappuntaw lit-turisti u anke lill-istess Maltin.

 Gypsy Fire: 

Emilia Gypsy Fire fuq quddiem fid-dimostrazzjoni

Emilia Gypsy Fire jew aħjar il-Maltija Emilia Caruana minn Sydney kienet Malta flimkien mat-tifel tagħha. Emilia hija magħrufa fl-Awstralja bħala attivista fejn jidħlu d-drittijiet tal-bniedem u forsi iktar dwar ir-relazzjoni sesswali li kellha mal-kantant magħruf Bob Dylan fl-1986. Emilia malajr daħlet fl-ispirtu ta’ l-okkażjoni u kienet fuq quddiem fid-dimostrazzjoni favur id-drittijiet tar-refuġjati li saret fit-toroq ta’ Paceville kif juru dawn ir-ritratti.

Ritratt ieħor tal-protesta li saret f'Paceville