Ilna ftit ma niltaqgħu. Kulltant ikollna bżonn ftit ta’ mistrieħ. Madankollu xorta waħda waqt il-ħemda u l-kwiet tiltaqa’’ ma diversi okażjonijiet li jħallulek memorji u osservazzjonijiet li nixtieq naqsam magħkom mhux biss bil-kitba iżda wkoll bir-ritratti.
 
Ma’ Malta kollha jsiru ħafna xogħolijiet biex issebbħu lill-gżejjer tagħna. Ħafna minn dawn il-proġetti joħolqu wkoll diversi argumenti  u  kontroversji.  Min  għax  il-proġetti jmorru kontra l-interessi personali tagħhom u wisq iktar minħabba l- polarizzazzjoni politika f’pajjiżna.
 
Qiegħed isir restawr meħtieġ fil-faċċati tal-Bibbjoteka u l- Palazz  tal-President  fil-Belt  Valletta  iżda  l-iktar evidenti hu l-proġett ta’ Misraħ San Ġorġ, magħruf bħala l-pjazza tal-Main Guard quddiem l-istess Palazz tal-President tar-Repubblika ta’ Malta.
 
Fil-preżent nistgħu naraw , kif jidher sewwa f’dan ir-ritratt, il-ħafna taqlib u konfużjoni iżda skond il-pjanti jidher li se tkun pjazza xierqa ta’ quddiem il-palazz ewlieni tal-belt tagħna.
 
Wieħed jista’ jinnota li biex qiegħed isir dan il-proġett il- monument tant sabiħ u storiku tas-7 ta’ Ġunju 1919 ġie mneħħi kompletament mingħajr ma ngħata ħjiel x’se jsir minn dan il-monument. Hawn min qiegħed jgħid li se jkun f’post prominenti ħdejn  il-Parlament il-ġdid li ġie mħabbar li se jinbena f’Misraħ il-Ħelsien. Nittamaw għax fil-pjanti li ħarġu ma hemm l-ebda ndikazzjoni fejn se jidħol dan il-monument.
 
Kienet ħasra wkoll li dis-sena, iċ-ċeremonja li kellha ssir quddiem dan il-Monument kellha ssir f’jum ieħor minħabba li fis-7 ta’ Ġunju kien hemm l-elezzjonijiet ta’ EU. Ftit nista’ nifhem għaliex min hu nkarigat iwaqqaf lill-Malta kompletament għax kien hemm sempliċi elezzjoni għall-membri Parlamentari li jservu fl-Unjoni Ewropea.
 
La semmejt il-Parlament li se jinbena ma tistgħax tkun Malta waqt li ġie mħabbar dan il-proġett tant ambizzjuż u ma tinqabadx fl-uforja ta’ l-aħbar u l-mijiet ta’ opinjonijiet varji li jidhru fuq il-gazzetti, radjijiet u TV, min ifaħħar u min imaqdar. Hawn ukoll tidħol il-pika politika għax f’Malta din għadha toħnoq kull sens ta’ raġunar u patrijottiżmu.
 
Mhux se nidħol fil-polemika li għadha sejra bla waqfien jekk kellux jinbena mill-ġdid it-teatru u għaliex inħasset in-neċessità li jinbena Parlament ġdid eżattament f’Misraħ il-Ħelsien. Li ħadd għadu ma spjega bid-dettall kif se nonfqu 80 miljun euro biex nirranġaw il-frakass li ħalliet warajha l-aħħar gwerra dinjija u anke nerġgħu nibnu għat-tieni darba l-bieb ewlieni tal-belt Valletta mingħajr ma tħabbar xejn dwar il-venda tal-karozzi li hi bla  dubju mhux biss ta’ periklu, inkonvenjenza u l-quċċata ta’ l-ikbar diżorganizzazjoni li qatt tista’ tara iżda fuq kollox ta’ diżunur għall-pajjiżna li jrid jgħix mit-turiżmu.
 
Dan il-proġett kif hu mfassal mill-Perit Taljan, Enzo Piano skond struzzjonijiet mill-Gvern ta’ Dr Lawrence Gonzi se jġib miegħu riorganizzazzjoni enormi ta’ kif il-poplu Malti jasal lejn il-belt kapitali tiegħu kemm bil-vetturi u kemm bil-mixi.
 
Ħadt pjaċir nara kif Triq il-Merkanti illum ġiet irranġata u bid- dehra tal-ħitan u l-palazzi li hemm jerġgħu jiġu gawduti sewwa mill-poplu. Il-Monti xorta għadu konfuzjoni u geġwiġija iżda dan x’aktarx li hu riżultat ta’ belt żgħira u spazju limitat.

Inkompli ġimgħa oħra b’iktar osservazzjonijiet, kummenti u ritratti.

Ix-xogħol li qiegħed isir fil-pjazza San Ġorġ, il-Belt Valletta

Id-disin ta' Piano għal bieb il-Belt

Bieb il-belt kif hu llum

Triq il-Merkanti kif hi llum