Ahbarijiet mill-Awstralja

It-Tnejn, 11 ta' Mejju 2009

Aħbarijiet
mill-Awstralja

ma' Lawrence Dimech OAM J.P.
Għal aktar aħbarijiet mill-Awstralja aqraw The Maltese Herald
li toħroġ fl-Awstralja kollha kull nhar ta' Tlieta.

Kien emigra lejn l-Awstralja

Ftit ġimgħat ilu Malta għaddiet minn taqliba kbira. Inkiteb patafjun fuq il-ħatra ta’ l- avukat Qormi, George Abela. Ma hemm l-ebda dubju li se jkun President għall-Maltin kollha huma fejn huma fid-dinja. Għalhekk ir-Repubblika tagħna għandha President biex iqawwi fina dik it-tama ta’ nazzjon wieħed, nazzjon magħqud li ħafna drabi nitwarrbu minnu minħabba l-politika partiġġjana.

L-għaqda u t-tolleranza ma tasalx billi niktbu u nitkellmu fuqha iżda trid tkun fil-qalb tagħna. Il-President waħdu ma jasalx. Ilna nisimgħu l-frażi “Flimkien kollox hu possibbli” issa wasal il-mument ta’ prova.

Bħala Malti li ħriġt barra minn art twelidi fuq bażi permanenti osservajt dak lil qal il- President tar-Repubblika fid-diskors inawgurali tiegħu.

Semma’ lill-Maltin ta’ Barra u qal li mhux se jinsina. Ma għandi dubju ta’ xejn dwar dan speċjalment meta naf li l-President daq bħali u bħalkom il-firda li ġġib magħha l- emigrazzjoni. Dan għaliex bħala tifel żgħir, il-ġenituri ta’ George Abela ħaduh magħhom lejn l-Awstralja.

Mela llum Malta Repubblika għall-ewwel darba għandha President li kien emigrat. Għalhekk mhux biss jista’ jitkellem dwar il-Maltin tad-Diaspora b’ċertu simpatija iżda għandu l-esperjenza attwali ta’ emigrant.

President tar-Repubblika ta' Malta flimkien maż-żewġ uliedu.

L-ispirtu ta’ l-Anzacs f’Argotti wkoll

Wara stennija ta ħafna snin il-Malta Environment & Planning Authority (MEPA), bla dubju l-agħar u l-iktar awtorità kontroversjali li qatt kellha Malta approvat il-mafkar iddedikat lill-ANZACs li ġie propost biex isir fil-ġonna ta’ l-Argotti, il-Furjana. Il-MEPA tassew ħadet falza stikka meta ppruvat minn kollox biex dan il-monument ma jsirx f’dan il-post ċentrali. Ir-raġunijiet li ħarġu bihom kienu banali. Donnu l-iskop kien li jaqtgħu qalb il-kumitat speċjali kompost minn membri taż-żewġ għaqdiet, Maltese Australians u Friends of Australia u oħrajn milli jkomplu b’din l-idea għax min ħasibha ma kienx xi ħadd ta’ ġewwa.

Nicholas Bonello, iċ-ċerman ta’ dan il- kumitat qalilna li dan il-mafkar se jkun l- uniku wieħed apposta dwar l-ANZACs mibni barra mill-Awstralja.

Il-konnessjoni ta’ pajjiżna Malta ma’ l- Anzacs hija qawwija. Meta s-suldati Awstraljani u ta’ NZ daħlu f’Gallipoli t- Turkija fl-ewwel gwerra tal-1915 sofrew telfiet kbar. Daħlu fix-xtajta li baqgħet mfakkar bħala Anzac Cove li saret ċimiterju għal 8141 suldat. Ħafna mill- 57,950 suldati allejati li ġġieldu fid- Dardanelles u sfaw midruba u feruti ġew meħuda Malta fi sptarijiet apposta li ġew imwaqqfa biex jikkurawhom. Malta ħadet il-laqam ta’ Nurse of the Mediterranean. 229 Awstraljan u 99 suldat minn NZ mietu u ndifnu fiċ-ċimiterju militari tal- Pieta, mhux bogħod wisq minn fejn se jiġi mibni dan il-mafkar.

Il-Maltese Herald, l-unika gazzetta Maltija fl-Awstralja għadha kemm nediet fund speċjali għal dawk il-Maltin fl- Awstralja li jixtiequ jgħinu finanzjarjament

Grupp ta' Maltin li ħadu sehem fil-march f'Jum l-Anzac f'Sydney.

Mudell tal-monument Anzac li se isir fl-Argotti l-Furjana. Jidher ukoll Nicholas Bonello.

biex jinbena dan il-mafkar. Ikun xieraq jekk dan il-monument ikollu l-appoġġ tal- Maltin fl-Awstralja.

F’Jum Anzac 2009 bħal ma jsir kull sena l-Maltin ħadu sehem sħiħ f’kull belt kapitali jimmarċjaw spalla ma’ spalla mal-veterani tas-servizzi Awstraljani li tant jgħożżu u jfakkru b’solennità dan il- jum. Ma jistgħax jonqos li dawk li attwalment servew fl-aħħar gwerer mondjali fejn kienu involuti l-Maltin illum huma avvanzati ferm fl-eta’ u għalhekk qed jonqsu milli jimmarċjaw iżda l- Għaqda ta’ l-RSL qed tħalli lid- dixxendenti tal-veterani tal-Militar jimmarċjaw b’riżultat li qiegħed ikun hemm rappreżentanza mhux ħażin kull fejn jimmarċjaw il-Maltin.

Post ġdid ta’ arti f’Melbourne

Il-Professur Maurice Cauchi fetaħ uffiċjalment Art Studio & Gallery li huwa l-idea ta’ Maltija, Rita Muscat Galea li emigrat lejn l-Awstralja fl-eta ta’ 16-il sena fl-1973.

Din l-avventura ta’ din l-artista bl-isem ta’ Muscart Art Studio & Gallery tinsab f’29 Stubbs Street Kensington (Melbourne).

Dan il-post se jipprovdi post fejn studenti ta’ l-arti kemm tradizzjonali u anke moderna, jkunu jistgħu jirċievu kull għajnuna u inkuraġġiment. Ikun hemm korsijiet fultajm u partajm u anke workxops fil-weekend waqt li hu post fejn jistgħu jsiru esibizzjonijiet kemm ta’ dawk li jkunu qegħdin jitgħallmu u anke l-għalliema tagħhom.

Għal iktar informazzjoni żuru l-website www.muscart.com.au

Rita Muscat Galea

L-ankra ta’ San Pawl?

Mhux soltu li ktieb ġdid jiġi llonċjat min hu l-awtur iżda hekk ġara dan l-aħħar fis- sala Annunciation tas-sorijiet Duminkani fi Blacktown NSW. L-Assoc Professur Stephen Gatt deher ferm emozzjonat u kburi jintroduċi r-rakkont li kiteb ħuh, Mark Gatt bl-isem ta’ Pavlvs - The shipwreck of 60 AD.

Dan il-ktieb li f’Malta ġie mniedi mill-eks President Dr Eddie Fenech Adami fih riċerka mirquma minn Mark Gatt, bugħaddas magħruf sewwa f’Malta wara s-sejba storika tiegħu ta’ ċippa ta’ ankra li jingħad li hi parti mix-xini li fuqu kien hemm Pawlu ta’ Tarsu meta dan l- Appostlu inkalja f’Malta, naħat tas-Salini fi triqtu lejn Ruma.

Minħabba l-fatt li hemm xi dubji fejn attwalment inkalja missierna San Pawl, jekk u meta din is-sejba tiġi vverifikata, tkun waħda ta’ sinifikat enormi għall- istorja reliġjuża ta’ pajjiżna u biex ma jibqa’ l-ebda dubju li Pavlus inkalja fejn

huma indikat illum u fejn hu magħruf bħala San Pawl il-Baħar.

Il-ktieb fil-fatt ġie mniedi mill- Kummissarju Għoli għal Malta fl- Awstralja u NZ, l-ET Francis Tabone u minn Fr Ben Sant li t-tnejn tkellmu fuq dan il-ktieb u l-effett li jista’ jkollha din is- sejba. Fr Sant fakkar ukoll fix-xogħol tas- Soċjetà Missjunarja ta’ San Pawl fl- Awstralja. Rigu Bovingdon għamel il- kummenti tiegħu billi kkwota minn kiteb antik biex juri kemm tista’ tkun importanti u storika din is-sejba ta’ l- ankra u dak li kiteb dwarha l-awtur Mark Gatt.

Ħadu sehem ukoll l-JC Choir mal-pjanista Charles Galea. Tkellmet wkoll Sr Giorgina Sultana. Ġiet miġjuba wkoll l-istatwa ta’ driegħ ta’ San Pawl minn Paul Farrugia. Kienet lejla addattata speċjalment meta din hija s-sena Pawlina. Dawk li jixtiequ kopja tal- ktieb għandhom jiktbu lil A/Prof S. Gatt,

Il-qoxra tal-ktieb Pavlvs ta' Mark Gatt

PO Box 803 Anzac Parade Kensington NSW 1465 jew bil-fax 02 9697 9243.

Ġejna t-tielet

Meta f’Warilla Bowling Club (naħat ta’ Wollongong NSW) saru l-aħħar logħbiet tal-World Men’s Singles 09 fejn kien hemm jikkompetu 22 plejer minn 21 pajjiż kien hemm fosthom il-Malti, Shaun Parnis li spiċċa fit-tielet post flimkien ma’ l-Irlanda u Spanja fis-sessjoni ta’ l-Irġiel. Sfortunatament ma daħalx fil-kwarti finali għalkemm tilef biss tlett logħbiet.

Leif Selby ta’ l-Awstralja rebaħ il-kampjonat biex sar iċ-ċampjin tad-dinja. Il-Malti Shaun Parnis irregala “bowl cloth” lill-għaxar kompetitur li lagħab kontrihom liema rigal kien donazzjoni minn għand il-Maltese Bowlers Association ta NSW. Għadd sabiħ ta’ membri mill-għaqda Maltija tal-bowlers marru f’Warilla biex jagħtu appoġġ sħiħ lil Shaun. Prosit lil Malta Lawn Bowls Association u r-rappreżentanza fl-Awstralja għax permezz ta’ Shaun, Malta kienet rappreżentata f’din il-kompetizzjoni mondjali għal darba oħra. Il-kowċ ta’ Shaun, Troy Sommerville ħaqqu wkoll ringrazzjament.

Nieħdu gost jekk tibgħatuli aħbarijiet mill-komunità biex indaħħluhom f’din il-website li tmur mad-dinja kollha b’kalkolu ta’ madwar 1500 qarrejja fil-ġimgħa. Ibgħatu lil lawdimech@optusnet.com.au

Jekk trid taqra l-artikli ta' dawn il-paġni li dehru qabel
Agħfas Hawn