Ahbarijiet mill-Awstralja

It-Tnejn, 20 ta' April 2009

Aħbarijiet
mill-Awstralja

ma' Lawrence Dimech OAM J.P.
Għal aktar aħbarijiet mill-Awstralja aqraw The Maltese Herald
li toħroġ fl-Awstralja kollha kull nhar ta' Tlieta.

Jitħallat ma’ kulħadd

Ftit ilu ħabbarna li l-Gvern ta’ Malta wara erba’ snin mingħajr Konslu Onorarju fin-naħat ta’ Brisbane fl-iStat ta’ Queensland ħatar lil George A Borg Olivier ta’ 72 sena li ilu jgħix l-Awstralja 41 sena. Mill-ewwel dan il-Konslu Onorarju kellu laqgħa kordjali mal- Maltese Australian Association ta’ Queensland meta dawn organizzaw riċeviment f’Darra Church Hall Brisbane.

Il-Konslu l-Ġdid ta spjegazzjoni dwar il- ħajja tiegħu f’Malta, fl-Army Ingliża kif ukoll fl-Awstralja waqt li fisser id-dmirijiet tiegħu bħala l-Konslu Onorarju f’dawn in- naħat. Huwa assigura lil dawk preżenti li lest biex jgħin lill-Maltin ta’ Brisbane f’dak li jkollhom bżonn.

Wara wieġeb għal diversi mistoqsijiet li għamlulu. Tħallat u kellem lil kulħadd u deher mill-ewwel li dan il-Konslu Onorarju se jimla vojt li ilu jinħass għal żmien twil mill-komunità Maltija ta’ Brisbane. Fuq kollox deher ukoll li George Borg Olivier huwa persuna dħuli li jaf jitħallat ma’ kulħadd.

Fir-ritratti l-Konslu l-ġdid jidher mal- kumitat tal-Maltese Australian Association of Qld. Mix-xellug jidhru Anthony Fenech, Mary Borg, Betty Piscopo, Margaret Fenech, Mary Radlof, Lucy Stewart, Carmen Farrugia Charlotte Thirkill u Pauline Muscat u fl-ieħor ma’ dawk kollha li kienu preżenti għal din l- okażjoni kordjali imma bżonnjuża.

Żwieġ fuq il-baħar

Wara li rebħet l-kompetizzjoni tant popolari Australian Idol fis-sena 2007, Natalie Gauci ta’ nisel Malti minn Melbourne donna ftit baqgħet tidher fix-xena tad- divertiment iżda ftit ilu ħadet deċizzjoni ferm ta’ importanza għaliha meta żżewġet lil Hamish Cowan li hu l-protagonist tal-grupp art-rock bl-isem ta’ Cordrazine fuq vettura tal-baħar f’nofs il-Port ta’ Philip Bay. Ix-xhud prinċipali kien “Dicko” Dickson li huwa wieħed mill-ġugaturi tal-Australian Idol. Ir-raġel ta’ Natalie li hu ta’ dixxendenza Skoċċiża kien liebes il-kilt bil-kulur tartan. Le, Nathalie ma libsitx l-għonnella. Wara li rebħet it-titlu ta’ The Australian Idol 2007, Natalie ġiet mistiedna Malta biex tkanta waqt kunċert biex fih jintgħażlu l-kontestanti għal Eurovision.

Il-familja tkompli tikber

Ftit ilu The Blacktown Advocate taw importanza lill-familja Maltija li bit-tfal u tfal tat-tfal diġà laħqu l-mija. Therese u Wenzu Grima emigraw lejn l-Awstralja minn Malta fil-20 ta’ Marzu 1951. Waslu Sydney fuq il-vapur SS Jenny u mill-ewwel xtraw

Natalie u Hamish Cowan

biċċa art kbira f’Walters Road Blacktown. Wenzu Grima ħadem fir-raba’ u Josephine li kienet il-kbira fost l- aħwa mill-ewwel tgħallmet issajjar, taħsel u tgħin lill-ġenituri tagħha f’kull bżonn waqt li ħadmet fil-fabbriki ta’ Stirling Henry u ma’ Arnott’s Biscuits f’Homebush.

Sadanittant iżżewġet u kellha erbat itfal. Il-familja baqgħet tikber u llum hemm 45 tfal u 101 tfal tat-tfal. Josephine Cuschieri qalet li ħafna mill-familja għadhom joqgħodu fin-naħat ta’ Blacktown u tista’ tissoponi l-ferħ meta jiltaqgħu kollha għal xi okażjoni speċjali. Mary Agius dan l- aħħar welldet lil Jake Paul li rreġistra bħala 101 wild tal-familja mnissla minn Teresa u Wenzu Grima.

Mix-xellug jidhru: Josephine Cuschieri (in-Nanna) b'Jake Paul Agius f'idejha, Mary Agius (l-omm) mat-tifel Nicholas u Mary-Jane Buttigieg (il-bużnanna).

Tagħlim tal-Malti

F’dawn l-aħħar snin jidher li t-tagħlim tal-Malti f’Sydney ħa spinta l-quddiem u iktar qed jitħajru jitgħallmu din il-lingwa li ġibna magħna mill-gżira ċkejkna ta’ Malta. Michelle Leniham ta’ nisel Malti li tgħallem fil-Kulleġġ Kattoliku, Terra Santa f’Schofield kienet hi stess qed titgħallem il-lingwa Maltija f’Horsley Park. Tant interessat ruħha li kkonvinċiet lil Maltese Language School ta’ NSW biex jibdew klassijiet speċjali fil-Kulleġġ fejn tgħallem hi, għax sabet li kien hemm xewqa mill-istudenti biex jitgħallmu l- Malti.

B’kollaborazzjoni ma’ Maria DeCarlo li hija l-ko-ordinatura ta’ l-Iskola tal-Malti bdew klassi għall-istudenti sekondarji minn Year 7 sa Year 10 liema klassi qed tikber u tissaħħaħ. L-iskop prinċipali hu li dawn l-istudenti jkun jistgħu iktar ‘l quddiem jitħajjru li jagħżlu l-Malti fl-eżami tal-HSC..

Il-klassi speċjali tal-Malti fi Schofield NSW ma' l-għalliema, Maria DeCarlo u Mary Muscat.

Għalkemm dan l-aħħar għadd żgħir ta’ studenti adulti għamlu l-eżami tal-HSC u dak l-isforz għandu jiġi mfaħħar iżda l-

futur għall-eżamijiet tal-HSC jiddependi ħafna miż-żgħażagħ li jkunu fl-iskejjel normali.

Anna Bligh

L-elezzjonijiet fi Queensland

Fil-15 ta’ Marzu kien hemm elezzjoni Statali fi Queensland fejn kulħadd bassar li l- Gvern Laburista ta’ Anna Bligh kien se jitlef l-elezzjoni għax l-Laburisti kienu diġà rebħu erba’ elezzjonijiet infila. Iżda r-riżultat finali ta rebħa deċiżiva lil din l-ewwel mara li ġiet eletta bħala Premier ta’ Stat fl-Awstralja. Il-Parlament il-ġdid fetaħ fil-21 ta’ April 09. Ir-riżultat finali huwa dan; Labor Party 51 siġġu, Liberal Country Party 34 siġġu u 4 Indipendenti.

Il-Laburisti ġabu biss 42,28% tal-voti primarji, l-inqas mill-elezzjoni tal-1998 iżda ftit setgħu igergru meta din fil-fatt kienet il-ħames elezzjoni nfila li rebħu f’dan l-iStat. Kien hemm Premiers oħra nisa bħal Joan Kirner f’Victoria u Carmen Lawrence f’Western Australia iżda dawn ma ġewx eletti bħal Premiers b’elezzjoni ġenerali. Anna Bligh ta’ 46 sena li ħadet post il-popolari Peter Beattie, 17-il xahar biss qabel ikkontesta elezzjoni u ħarġet rebbieħa u għalhekk saret l-ewwel Premier mara eletta mill-poplu..

Ħinijiet differenti

Dawk li jgħixu fl-Awstralja jafu sewwa kemm hi konfuża s-sistema tal-ħin minħabba l-kobor ta’ dan il-kontinent. Fl-ewwel Ħadd ta’ April kellha t-tmiem tad-daylight savings almenu fis-south eastern states u l-ACT. Id-DLS se jerġa’ jibda fl-ewwel Ħadd ta’ Ottubru 09. Għalhekk il-ħin tas-sajf jew DLS hu osservat f’NSW (Sydney), Victoria (Melbourne), South Australia (Adelaide), Tasmania (Hobart) u l-ACT (Canberra). Dan ifisser li ma’ dawn in-naħat li josserva l-ħin tas-sajf u Malta issa hemm differenza ta’ 8 siegħat flok l-10 siegħat ta’ qabel. Queensland u NT ma josservawx il-ħin tas-sajf.

Nieħdu gost jekk tibgħatuli aħbarijiet mill-komunità biex indaħħluhom f’din il-website li tmur mad-dinja kollha b’kalkolu ta’ madwar 1500 qarrejja fil-ġimgħa. Ibgħatu lil lawdimech@optusnet.com.au

Jekk trid taqra l-artikli ta' dawn il-paġni li dehru qabel
Agħfas Hawn