Fil-pajjiż li ngħix jien, ħassejna dan it-terremot finanzjarju wkoll iżda l-Awstralja hija waħda mill-ftit pajjiżi li ma daħlitx f’riċessjoni.
 
L-Awstralja kienet ilha tgawdi  minn għaxar snin ta’ ġid kbir riżultat tar-resources boom u t-talba għal dawn ir-riżorsi minn pajjiżi bħaċ-Ċina u l-Indja li qed jiżviluppaw b’għaġġla fenomenali u riedu dak li l-Awstralja għandha bl-abbudanża.

Il-Gvern kellu surplus ta’ madwar $40 biljun u dejn xejn. Meta ġie  elett  il-Gvern  Laburista  ta’  Kevin Rudd, wara għaxar snin taħt il-Liberali/Nationals ta’ John Howard sab kaxxa mimlija flus iżda t-tsunami finanzjarju li sploda fis-sena 2008 ġab lill-Gvern Laburista dahru mal-ħajt.
 
Jidher li l-Laburisti wieġbu bi strateġiji effettivi tant li l-bejgħ fiż-żmien tal-Milied kien wieħed qawwi u l-inizjattivi li ġew implimentati mill-Gvern irrendew fiduċja fix-xerrejja li marru bi ħġarhom jonfqu flushom.

opportunità li barra li jattendi d-doveri tiegħi fil-WYD08 jagħti daqqa t’għajn lil dawk il-Maltin li baqgħu lejali lejn it- tagħlim tal-knisja kattolika.
 
L-Arċisqof u l-kontinġent tiegħu għamlu dawra siewja mal-komunità Maltija. Il- pellegrini żgħażagħ li ġew minn Malta kienu ambaxxaturi dehni mhux biss tar-reliġjoni kattolika iżda ta’ Malta wkoll.
 
Kellna wkoll fl-aħħar tas-sena żjara f’Malta mill-25 Gvernatur Ġenerali ta’ l-Awstralja, Quentin Alice Bryce, iżda iktar minn hekk, din l-ewwel mara li qatt żammet din l-ogħla pożizzjoni qabel imbarkat fl-ewwel vjaġġ tagħha bħal GG barra mill-Awstralja, tablet u rnexxielha tiltaqa’ mal-komunità Maltija ta’ NSW.

Fis-sena li għaddiet ukoll qalulna li se jerġgħu jorganizzaw konvenzjoni għall-Maltin ta’ Barra. Il-Kummissjoni Emigranti li daż-żmien hi mħabbta ferm bl-immigrati llegali li jidħlu Malta ħabbret li l-Konvenzjoni tagħha se tkun fl-1910 iżda l-Gvern jew aħjar il-Partit Nazzjonalista kien diġà ħabbar li se jorganizza Konvenzjoni għall-Maltin ta’ Barra fl-2014 jiġifieri fil-50 anniversarju ta’ l-Indipendenza.
 
Il-Kummissjoni Emigranti dejjem bl-għajnuna tal-Gvern diġà organizzaw żewġ Konvenzjonijiet għall-Maltin ta’ Barra, l-ewwel waħda kienet f’Lulju 1969 u t-tieni, tletin sena wara fil-bidu tal- millenju l-ġdid fl-2000. Jien attendejt dawn iż-żewġ Konvenzjonijiet u ppreżentajt “papers” fit-tnejn. Ma nistgħax ngħid li ż-żewġ Konvenzjonijiet kienu kollha ħela ta’ żmien.
 
Naf żgur li għalkemm il-konferenzi kienu għall-Maltin ta’ Barra dawk residenti f’Malta li qatt ma daqu l-emigrazzjoni żammew kontroll  assolut  f’kull  ma  ġie  ppjanat.  Minn  naħa  tagħna l-

emigranti nista’ ngħid li dawk iż-żewġ Konvenzjonijiet iktar kienu ta’ taħwid, iktar daħħlu konflitti u kwistjonijiet bejnietna u ħallew warajhom ħafna dubji u nuqqas ta’ rispett għal ħafna żmien wara.
 
Qabel nillonċjaw Konvenzjoni oħra rridu wegħda soda mill- Gvern li qabel niltaqgħu jkun diġà aċċetta l-kunċett ta’ Malta Akbar fejn jidħlu l-Maltin ta’ Barra, ikun waqqaf Mużew ta’ l- istorja ta’ l-emigrazzjoni minn Malta (mhux immexxi totalment minn aġenti tal-Knisja), li l-istorja ta’ l-emigrazzjoni tkun daħlet fil-kurrikulum ta’ l-iskejjel f’Malta, ikun appuntat Ministeru biex jieħu ħsieb l-interessi tal-Maltin ta’ barra u li ċ-ċittadinanza Maltija meta tiġi mogħtija jkollha l-istess saħħa għal kullħadd.
 
Dawn huma l-kundizzjonijiet li huma meħtieġa qabel ma nibdew niddiskutu l-futur. Li nidħlu għal Konvenzjoni oħra mingħajr ma jkollna f’idejna dak li tlabna fl-2000 ikun kollu telf ta’ riżorsi u żmien prezzjuż.