In-neċessità ta’ l-istorja ta’ l-emigrazzjoni

 Il-Malti ilu minn żmien żemżem jitlaq lil pajjiżu biex ifittex futur aħjar. Jiena żgur li kieku pajjiżna seta’ joffrilhom xogħol adegwat u futur aħjar. eluf kbar li ħallew il-gżejjer Maltin kienu jagħżlu li jibqgħu Malta. Ma tlaqniex pajjiżna f’xi dgħajjes bħal tar-refuġjati li qegħdin jersqu lejna dawn iż-żminijiet għalkemm kien hemm ħafna każijiet fejn qalftuna ‘l barra fuq vapuretti ftit ikbar mill-inġenji li qed jaslu max-xtajtiet tagħna.

Kienu ħafna dawk l-emigranti li waslu fl-art imwiegħda li ġew mitfugħa f‘kampijiet u barracks qodma tas-suldati jew f’akkomodazzjoni orribbli. Forsi għalhekk aħna l-emigranti nħarsu lejn ir- refuġjati bi ftit iktar ħniena għax ħafna minna niftakru minn x’hiex għaddejna. Le, ma konniex ittimbrati bħala refuġjati anzi kellna l-barka tal-Gvernijiet u l- knisja tagħna iżda naf ħafna li sofrew daqs kemm qegħdin isofru r-refuġjati llum.

Jekk pajjiżna Malta hija kburija b’ħafna aspetti ta’ l-istorja tagħha u kif xieraq, tfakkar sewwa dawk l-avveniment storiċi hekk ukoll b’entużjażmu għandha tikteb u tfakkar l-istorja ta’ l-emigrazzjoni minn Malta.

L-emigranti ilhom jitkarrbu snin kbar biex f’Malta jkollna mużew sura ta’ nies biex ifakkar, kemm l-emigrazzjoni minn Malta tul is-sekli kif ukoll il-kontribut enormi li l-emigranti rregalaw lil Malta wara li stabbilixxew ruħhom fil-pajjiżi li marru. L- emigranti qed jitolbu Mużew li ma jkunx iddominat u mitfugħ taħt sezzjoni waħda tal-komunità Maltija iżda li jkun mużew li jħares lejn l-aspetti kollha.

 Insult lil Awstralja

 Għal dawn l-aħħar snin grupp ta’ Maltin f’Malta b’assoċjazzjoni ma’ l- Awstralja qegħdin b’taqtigħa mal-Malta Environment & Planning Authority (MEPA) biex ikunu jistgħu jibnu monument biex jikkomemmoraw l- ANZACs, (Australian New Zealand Army Corps), le mhux xi diskoteka fil-Mistra jew xi bini fuq art ipprojbita. Iriduh f’post ċentrali biex igawduh il-ġenerazzjonijiet li ġejjin. Biex fuq kollox niftakru f’dawk li bi qlubija ħallew ħajjithom fl-ewwel gwerra speċjalment dawk li Malta offritilhom kenn u ħniena biex ġew jirkupraw f’art twelidna meta Malta kienet magħrufa bħala l-Isptar tal- Mediterran.
 
Fil-25 ta’ April, l-Awstralja b’sollenita kbira tiċċelebra l-Anzac Day li ħafna jgħodduh bħala l-jum nazzjonali propju ta’ dan il-pajjiż. Il-Maltin li kienu fis- servizz jimmarċjaw bi kburija fit-toroq ta’ l-Awstralja kollha taħt il-bandiera Maltija waqt ċapċip mill-folol li jimlew it-toroq għal din l-okażjoni solenni.
 
Ma hemmx bżonn li nfakkru li fiċ- ċimiterji ta’ Malta għad hemm Awstraljani u New Zealanders midfuna. Dawn il-pajjiżi ġġieldu flimkien magħna, kienu allejati f’kull gwerra mondjali.