Parteċipazzjoni sħiħa miż-żgħażagħ
 waqt avveniment annwali għall-anzjani

 Ma hemm l-ebda dubju li l-Quiet Achievers Night of Recognition li jippreżentaw kull sena l-Maltese Welfare (NSW) saret avveniment mhux biss mistennija iżda waħda mill-aħjar li jkollna fil-komunità Maltija ta’ NSW. Għal darba oħra nhar il-Erbgħa fl- Annunciation Hall ta’ St Dominic Hostel f’Blacktown NSW kellna ftit iktar minn sagħtejn ta’ preżentazzjoni ta’ klassi għolja u dinjituża.

Dan l-avveniment isir kull sena fis- Seniors Week ta’ NSW taħt il-patroċinju ta’ l-Onor John Aquilina MP (Leader of House, NSW Parliament) li bi kliem meqjus għalaq din il-laqgħa b’appell biex nibqgħu ngħożżu u niftakru fil-ħidma sfiqa tal-veterani tagħna waqt li ninkoraġġixxu aktar parteċipazzjoni miż- żgħażagħ.

Kienet lejla wkoll ta’ diversi tifkiriet, speċjalment is-segment li fakkar l- għoxrin anniversarju ta’ kemm ilha tilqa’ residenti d-Dar ta’ Xjuħ ta’ St Dominic’s. L-ewwel resident li ġie aċċettat fl-1988 kien Salvu Pace mill-Gżira.

Barra dan ġie mogħti għarfien xieraq lil Sr Alice Forbes li kontinwament ilha sservi fid-dar tax-xjuħ għal għoxrin sena sħaħ. Sr Alice dalwaqt se tiċċelebra l- ġublew tad-deheb tal-professjoni tagħha. Għalkemm mhux Maltija iżda għamlet għaxar snin bħala majjistra fl-isptar ta’ Santa Katarina f’H’Attard u hija parti ntegrali mill-komunità, sa anke titkellem tajjeb bil-Malti. Sr Alice fost ċapċip kbir rċeviet ċertifikat ta’ apprezzament u bukkett fjuri mill-President tal-Maltese Welfare.

Il-parteċipazzjoni taż-żgħażagħ spikkat ferm meta ġie ppreżentat segment dwar il-World Youth Day 08. Kien hemm preżentazzjoni viżwali tal-kanzunetta, it- tema tal-WWD 08: Receive the Power kantata minn Guy Sebastian u Garry Pinto b’dehriet mis-soprano Amelia Farrugia u Robert Galea, it-tnejn Maltin.
 
Biex ikompli l-aċċenn fuq iż-żgħażagħ, James Cassar, żagħżugħ ta’ dixxendenza Maltija mimli talent, kanta tlett kanzunetti b’ħila kbira, speċjalment Il-Bajja tal-Mellieħa.

Kien imiss lil Adrienne Vella., il-Youth Co-Ordinator tas-St Vincent de Paul li attendiet żewġ World Youth Days fl- ibliet ta’ Ruma u Cologne fl-Ewropa li tkellmet b’elokwenza dwar l-esperjenza tagħha u ħeġġet lil dawk preżenti biex jieħdu parti attiva f’din l-okazzjoni unika li se jkollna Sydney fil-preżenza tal- Papa Benedittu. Ms Vella tassew impressjonat u qalgħet tifħir bil-mod kif tkellmet dwar il-World Youth Day.
 
Dawk li mlew is-sala setgħu wkoll jaraw esibizzjoni ta’ pittura ta’ personalitajiet prominenti Maltin li ġiet ippreżentata minn Charles Schembri liema wirja dehret li kienet ferm popolari. Fost il- pitturi, kien hemm dawk ta’ Dun Ġorġ, Beata Mary MacKillop, il-Budaj,  Troy Cassar Daley u personalitajiet lokali bħal Joe Galea, Rigu, Joe Apap, Lawrence Dimech u Sam Vella. Il- Kummissarju Għoli għal Malta fl- Awstralja u NZ, l-E.T. Francis Tabone ppreżenta ċertifikat ta' tifkira lil dan il- pittur tax-xogħol artistiku tiegħu.
 
Il-lejla waslet fl-eqqel tagħha meta ġie magħruf li Gregory Caruana ġie mogħti unur speċjali mill-Gvern Statali ta’ NSW għax-xogħol tiegħu fil-qasam tal- voluntarjat. Il-ġimgħa l-oħra kellna rapport sħiħ fuq il-ħajja ta’ dan l-attur u promuter fil-qasam tal-palk Malti f’NSW.
 
Fl-aħħar saru l-preżentazzjonijiet lil tlettax il-persuna li din is-sena ġew magħżulin, wara nominazzjonijiet mibgħuta minn membri tal-komunità għax-xogħol tagħhom volontarju fil- komunità. Dawn kienu:

Anthony Agius, Mro Carmelo Baldacchino, Elsie Bugeja, Mary Camilleri,  Sr  Grace  Cini fcj,  Esther  & Frank Coleiro, Salvina Falzon, Joe Formosa, Annie Grech, Freda Micallef, Francis Psaila u Godfrey Sultana. L- awards tqassmu minn Louise Markus MP u l-Prof Stephen Gatt.

kumitat  ħabrieki  u  lil dawk kollha li b’ximod kienu ta’ għajnuna. Saret ukoll preżentazzjoni ta’ fjuri lis-superjura Giorgina Sultana li tmexxi St Dominic’s.

Il-lejla kienet immexxija tajjeb ħafna minn Nathalie Gatt waqt li Marlene Dimech u Maria DeCarlo kienu l-qarrejja. Lawrence Gatt kien il-fotografu u ko- ordinatur tekniku.

Fost dinjitarji oħrajn li attendew kien hemm l-E.T Francis Tabone, Kummissarju Għoli, il-Konslu Ġenerali Annamarie Bonnici, Louise Markus MP, il-Konti Charles Said Vassallo, Frank u Marie Louise Muscat, Harold u Marie Boddinar, Lino Vella, Ariel Fiorini, Fr John Briffa, Fr Leonard Testa, Charles Grech-Soler tal-BOV, Charles Mifsud tal-MCC u għadd ta’ Presidenti u rappreżentanti ta’ għaqdiet u radjijiet Maltin.