allmalta.com - Ahbarijiet mill-Awstralja

It-Tnejn, 31 ta' Marzu 2008

Aħbarijiet
mill-Awstralja

ma' Lawrence Dimech OAM J.P.
Għal aktar aħbarijiet mill-Awstralja aqraw The Maltese Herald
li toħroġ fl-Awstralja kollha kull nhar ta' Tlieta.

L-ocean żamm is-skiet għal 66 sena

Kienet l-ikbar traġedja fl-istorja navali Awstraljana iżda l-ocean żamm is-skiet għall-66 sena. Il-vapur HMAS Sydney (light cruiser 6830 tons), l-eroj tal-flotta Awstraljana waqt l-aħħar gwerra ġie mgħarraq ftit ‘l-bogħod mill-kosta ta’ Western Australia f’konfront qalil mal- bastiment Ġermaniż Kormoran (Raider, 8736 tons). Din in-naħa ta’ WA, f’qiegħ il-baħar sar il-qabar għal 645 baħri Awstraljan li kienu jservu fuq dan il-vapur tal-gwerra.

Fost dawn il-baħrin kien hemm tnejn ta’ dixxendenza Maltija, Salvatore Zammit li kien jaħdem bħala Canteen Manager u Samuel Psaila bħal assistant miegħu. F’dawn l-aħħar snin saru ħafna attentati biex jinstabu l-familjari ta’ Salvatore Zammit u Samuel Psaila. Ikkuntatjajt għalhekk lill-istoriku Mark Caruana li ġie mitlub biex jinvestiga il-każ ta’ dawn iż- żewġ Maltin u dan qalli li hemm tifel ta’ Zammit li jgħix Malta u llum daħal fit-80 sena. Jista’ jkun li kien jaħdem fl-uffiċju tal-prim Ministru fi żmien il-Perit Mintoff.

Jimmy Zammit

Il-vapur Awstraljan HMAS Sydney

It-tifel l-ieħor kien il-magħruf eks segretarju tal-Phoenician Club, Jimmy Zammit li miet f’Sydney xi snin ilu. Dwar Samuel Psaila għad ma għandniex tagħrif. Jekk xi ħadd għandu xi tagħrif nitolbukom li tikkuntatjawna kemm jista’ jkun malajr.

Fl-11 ta’ Novembru 1941, il-vapur Ġermaniż Kormoran fetaħ il-kanuni fuq l-HMAS Sydney minn ftit kilometri l- bogħod u mingħajr ma bagħat ebda sinjal li kien fl-inkwiet ħebb kompletament ftit bogħod minn fejn ftit jiem ilu, finalment instab il-fdal immermer tiegħu xi 100 mili nawtikali mix-xtajta ta’ Western Australia.

David Mearns li xogħolu jfittex dawn il- vapuri mgħarrqa ħabbar li kien sab fejn kien mgħarraq HMAS Sydney. Huwa kien diġà sab vapuri oħra li għerqu bħal battleship Bismarck u HMS Hood.

Huwa stmat li t-tfittxija għal dawn il- vapuri mgħarrqa qamet madwar $5 miljun.

L-ewwel vapur minn din it-traġedja krudili li nstab kien il-Ġermaniż, HSK Kormoran. Mill-vapur Ġermaniż salvaw 316 baħri u dawn ġew miżmuma bħala priġunieri fl-Awstralja għal madwar sitt snin. Kienu dawn il-baħrin, speċjalment il-kaptan tal-vapur Theador Detmers li tefgħu ħafna dawl fuq din it-traġedja krudili.

Din is-sejba storika fl-annali navali ta’ l-Awstralja ġiet imħabbra mill-Prim Ministru Kevin Rudd. Issa huwa ttamat li mill-fdalijiet ta’ l-HMAS Sydney ikunu jafu aħjar kif dan il-vapur għereq b’kulħadd fuqu u kif mank sabu fdalijiet. Fl-1941, l-aħbar ta’ din it-traġedja ġie mħabbra lill-poplu Awstraljan sebat tijiem wara li ġrat.

Jittama għal Beijing

It-tiratur Malti ta’ fama mondjali, Adam Vella jidher li tilef it-tama li jerġa’ jiġi magħżul biex jikkompeti fl-Olimpjadi li se jsiru fiċ-Ċina. Dan l-atleta ta’ 36 sena li għandu żewġt itfal u joqgħod f’Melbourne kien diżappuntat għal-aħħar meta naqas li jikkwalifika b’target wieħed fil-men’s trap Beijing Olympic Team. Adam Vella li huwa magħdud bħal l-aqwa trap shooter tad-dinja tant li f’Jannar tas-sena l-oħra rebaħ il- kampjunati nazzjonali qiegħed jiċċalenġja l-kriterja li biha jiġu magħżula dawn it- tiraturi. Huwa mistenni jappella d-deċiżjoni lill-Australian International Shooting Ltd li għażlet fit-tim lil Graig Henwood u Michael Diamond u ħallietu barra.

Adam Vella rebaħ il-midalja tal-bronż fl-Olimpjadi ta’ Ateni fl-2004 u qal li f’dawn l- aħħar tlett snin għamel dak kollu meħtieġ biex jikkwalifika u ma jixtieqx li jżomm l- appell tiegħu fuq bażi personali. Fl-aħħar tiratura li saret f’Sydney, waħda mill-erba’ biex jintgħażlu l-aħjar tnejn għal-Beijing huwa spara aħjar minn Henwood u Diamond iżda xorta ma ġiex magħżul.

Adam Vella

Isemmu vapur għalih

Il-mewt ta’ Tony Vella li kien prominenti ħafna fil-qasam unjonistiku ta’ Melbourne ħalliet vojt immens. Huwa miet fin-Northern Hospital Epping fl-eta ta’ 78 sena. Huwa dejjem ħadem biex iktar emigranti jkunu attivi fil-ħidma ta’ l-Unions.

Tony Vela twieled fl-Eġittu iżda għandu dixxendenza Maltija. Wasal Melbourne fl- aħħar tal-’40s u daħal fil-Merchant Navy. Fl-1956 huwa telaq il-baħar u mill-ewwel daħal mal-AWA Huwa żżewweġ lil Victoria Beck u kienu jgħixu f’Pasco Vale, Melbourne. Meta kien chairman tal-Port of Melbourne Authority flimkien ma’ martu eskortaw lil Prinċep Charles u Diana meta dawn attendew għal Melbourne Cup fl- 1983.

Fl-1982 ġiet onorat bl-Order of Australia u l-Australian Workers Union ħatruh membru għal għomru fl-2001. Tony serva bħala chairman tal-Port of Melbourne għal tlett darbiet fis-snin tmenin u f’din il-pożizzjoni kien inkarigat mid-dredging tal-Port ta’ Geelong, proġett li sewa biljuni ta’ dollari fil-kanal ta’ Port Phillip.

Taħt it-tmexxija tiegħu kellu madwar 850 ħaddiem tant li l-Port of Melbourne Authority semmew il-vapur tat-tħammil bl-isem ta’ A.M. Vella. Dan il-Malti beda l- karriera tiegħu fl-Union ta’ 55 sena u meta wasal biex irriżenja bħala assistant segretarju tat-Trades Hall Council ta’ Victoria kien ilu għaxar snin sħaħ bħal uffiċjal fulltime.

Tony Vella

Kif tista’ tagħmel fortuna

Waqt li l-banek ikomplu jgħollu r-rata ta’ l-interessi fuq is-self għax-xiri ta’ djar, kellna tnax-il żjieda wara xulxin jidher li hawn skarsezza ta’ art fejn jistgħu jinbnew djar għall-familji. L-iżviluppaturi qed jaħtfu kull biċċa art possibbli. Minn dan qed igawdu dawk il-bdiewa jew oħrajn li jaħdmu l-art u li xtraw acres kbar fis-snin l- imgħoddi.

Wieħed minn dawn l-ixxurtjati jidher li hu Steve Spiteri li għandu propjetà ta’ 16-il hectare f’Wyndham (qrib Melbourne) li jagħmel użu minnha bħala horse stud farm.

Huwa xtara din il-propjetà madwar 12-il sena ilu bi prezz ta’ $375,000. Huwa stmat lil din il-propjetà llum tiswa madwar $11.2 miljun. Steve Spiteri qal li diġà kellu talba minn xi żvilluppaturi biex jixtru l-art tiegħu iżda ma għandux ħsieb li jbiegħ malajr għax skond hu jħobb dan il-post u ħadem ħafna fih. Iżda qal ukoll li dejjem jara propjetarji tal-viċin ibiegħu u bini tiela’ madwar il-propjetà tiegħu.

Spiteri Steve

Il-purċissjoni tal-Ġimgħa l-Kbira mħassra

Temp imqalleb u xita għat-tieni sena nfila żammew il-purċissjoni tradizzjonali tal-Ġimgħa l-Kbir li ssir fis-subborg ta’ Horsley Park milli toħroġ. Dan l-ispettaklu li sar sinonimu mal-ħajja ta’ Sydney jkun mistenni u eluf imorru biex jaraw din il-purċissjoni mfassla fuq l-istil ta’ dik tal-Mosta. Madwar 300 persuna jieħdu parti fil-purċissjoni.

Intqal li din il-purċissjoni ġiet imħassra minħabba x-xita erba’ darbiet kemm ilha toħroġ f’dawn l-aħħar 21 sena.

Ħafna Maltin jivvjaġġaw minn eluf ta’ mili bogħod u anke jiġu minn Stati oħra biex jieħdu parti f’din il-manifestazzjoni tradizzjonali ta’ fidi u għalhekk tista’ taħseb kemm kien qawwi d-diżappuntament meta tħassret il-purċissjoni minħabba temp ikrah u bix-xita tqattar u b’ħalbiet kulltant minn sbieħ il-jum.

Waħda mill-vari tal-Ġimgħa l-Kbira f'Horsley Park NSW