allmalta.com - Ahbarijiet mill-Awstralja

It-Tnejn, 10 ta' Marzu 2008

Aħbarijiet
mill-Awstralja

ma' Lawrence Dimech OAM J.P.
Għal aktar aħbarijiet mill-Awstralja aqraw The Maltese Herald
li toħroġ fl-Awstralja kollha kull nhar ta' Tlieta.

Għotja lil tal-Hamrun

Ħafna mill-għaqdiet etniċi fl-Awstralja jiddependu fuq l-għajnuna li jagħtihom il- Gvern, kemm Statali u anke l-Gvern Federali biex skond il-politika ta’ integrazzjoni jkompli jgħożżu l-kulturi u l-użanzi tagħhom biex maż-żmien isiru wkoll ħaġa waħda f’komunità multikulturali. Minn dawn l-għotjiet gawdew ħafna.

Tul iż-żmien il-komunità Maltija akkwistat diversi għotjiet mill- Gvernijiet li kienu ta’ għajnuna kbira lill-għaqdiet Maltin. Insemmi forsi l-ikbar għotja li qatt irċevew il-Maltin ta’ NSW kienet meta fl- 1984 il-Gvern Federali ta l-għotja ta’ $263,616 mill-Community Employment Fund lill-Melita Eagles Soccer Club biex jibnu stand fil-Melita Stadium. Wara 24 sena, is-somma li akkwista, f’għotja waħda dan il-klabb tal-futball Malti għadha sallum rekord.

Tħabbar mill-Gvern Statali li l-Hamrun Association li għandhom ċ-ċentru tagħhom li jinsab f’Jackson Street f’Marsden Park irċevew l-ammont ta’ $10,000 mill-2007-08 Sports and Recreation Capital Assistance Program biex ikompli jirranġaw il-post fejn jilgħabu l-boċċi li hu ferm popolari mal- membri. Il-Hamrun Association ilha mwaqqfa mis-sena 1982.

Biex iwasslu l-aħbar ta’ din l-għotja marru jżuru l-post il-Leader of the

Jilgħabu l-boċċi fil-klabb ta’ Hamrun f'Sydney. Jitfa’ l-boċċi jidher Alfred Farrugia, l-President.
Wara jidhru John Aquilina MP, Graham West MP u Paul Sciberras.

House, l-Onor John Aquilina u l-Ministru għall- iSports, l-Onor Graham West. L- Onor John Aquilina li hu magħruf sewwa bħala l-Membri Parlamentari popolari tad-distrett Riverstone speċjalment ma’ dawk li jiffrekwentaw dan iċ-Ċentru Malti faħħar il-progress li sar f’dan iċ-Ċentru u fisser kif il-Gvern Statali diġà qassam $4 miljun lil 299 grupp ta’ l-isports f’NSW biex dawn ikunu jistgħu joffru faċilitajiet aħjar lill-membri tagħhom.

Stanhope Gardens fejn għandu l-uffiċċju elettorali l-Onor John Aquilina rċevew għotja ta’ $25.000 biex jirranġaw il-faċilitajiet sportivi.

Fir-ritratt jidhru ż-żewġ Membri tal- Parlament flimkien ma’ Fred Farrugia (il- President tal-Hamrun Association) u wieħed mill-membri Paul Sciberras.

Ritratt kortesija ta' Natasha Paes.

L-anzjani attivi Maltin

Għadd ta’ Maltin anzjani jinġabru f’ħafna postijiet ta’ kull ġimgħa biex jiltaqgħu flimkien u jgħaddu ftit tal-ħin flimkien f’naħat differenti f’NSW kif jagħmlu anke Stati oħra ta’ l-Awstralja.

Nieħu gost meta jkolli xi ritratti ta’ dawn il-gruppi anzjani li għadhom tant attivi. Dawn il-laqgħat ta’ kull ġimgħa barra li jkattru l-ħbiberija u jagħmlu ħbieb ġodda jservu ta’ edukazzjoni siewja għax dawn l-anzjani jsiru jafu bis-servizzi pubbliċi li hawn għalihom kif ukoll tagħrif ieħor meħtieġ għal ħajja ta’ kuljum.

Wieħed minn dawn il-gruppi jiltaqa’ kull nhar ta’ Ġimgħa fil-Merrylands Community Health Centre taħt il-ħarsien tal-Maltija, Nancy Serg, il-Multicultural Health Worker, Maltese Speaking Group Leader. Ħadt gost ferm li kelli l- opportunità li naqsam ma’ madwar 26 persuna li attendew ftit siegħat ta’ tagħrif

Uħud minn dawk li jattendu l-laqgħa ta' l-anzjani. Fuq wara bil-wieqfa tidher Nancy Serg.

u diskussjonijiet għax f’dawn l- okkażjonijiet iżżomm ruħek aġġornat mal-bżonnijiet ta’ l-anzjani tagħna. Introduċejthom ukoll mal-ktieb Maltese Community Directory li huwa essenzjali

għal kull Malti/Maltija f’NSW minħabba l- informazzjoni li fih. Dan il-ktieb għadu għal bejgħ kemm jekk tiktbuli dirett u anke jekk tmorru fl-uffiċċju ta’ The Maltese Herald f’Merrylands NSW.

Il-missjonijiet fil-Pakistan u l-Filippini

Kull tant żmien nerġgħu niltaqgħu fl-Awstralja mas-soru missjunarja, Maria Esther Attard tal-Kongregazzjoni Maltija Franġiskana tal-Qalb ta’ Ġesù, magħrufin ukoll bħala “ta’ l- Istilla”. Din is-soru għamlet żmien isservi l-komunitajiet ta’ Rockhampton, Mackay fi Queensland u Port Kempla f’NSW.

Dejjem kellha x-xewqa li taħdem fil-missjonijiet u kellha esperjenza fil-Brazil fejn damet tmien snin u fl-Afrika fejn damet ħames snin oħra. Għaxar snin ilu ġiet mibgħuta fil- Pakistan fejn għadha hemm sallum taħdem fil-missjonijiet tal- Franġiskani flimkien ma’ 84 membri oħra bejn Maltin u Pakistani li jieħdu ħsieb wkoll il-missjonijiet fil-Filippini. Hemm 14-il opra ta’ edukazzjoni li jieħdu ħsieb madwar 6,000 tfal, il- biċċa l-kbira tagħhom orfni jew ulied il-fqar. Fost dawn hemm skejjel u kliniċi għall-fejqan tal-mard fejn it-tuberkulożi u hepatitis huma l-iktar akuti.

Lura fost il-familja tagħha f’Auburn NSW fejn qed tirkupra minn operazzjoni riċenti din is-soru Maltija minn familja ta’ 10 ilha fil-hajja reliġjuża minn meta kellha 16-il sena. Oħtha wkoll daħlet soru. Il-familja tagħha emigraw lejn Sydney fl-1959.

Is-soru Attard mat-tfal fil-missjoni.

Sr Maria Esther Attard ma' waħda mit-tfal

Illum, Sr Maria Esther Attard hija s-Superjura Reġjonali ta’ l- opri missjunarji ta’ l-Ordni Franġiskana fil-Pakistan u l-Filippini fejn skond ma qaltilna tiltaqa’ ma’ ħafna faqar f’pajjiżi li fihom hemm ħafna inċertezza u taqlib. Il-missjonijiet jiddependu ħafna mill-providenza t’Alla u dejjem sabu għajnuna speċjalment mill-Maltin.

Ħafna jxebbhu x-xogħol fejjiedi ta’ din is-soru Maltija u sħabha max-xogħol tal-Qaddisa Mother Teresa għalkemm xogħolhom mhux daqstant magħruf u għalhekk hemm iktar bżonn ta’ donazzjonijiet u għajnuna oħra.

Sr Attard għadha kemm iċċelebrat il-ġublew tad-deheb tagħha, 25 sena bħala soru flimkien mal-familja u ħbieb fil- Merrylands RSL Club NSW. Tieħu l-opportunità biex tappella għall-ġenerożità tal-Maltin biex ikompli jgħinuha fil-missjoni tagħha fost il-fqar. Ikkuntatjaw Mob: 0422 282056 jew fcj@cyber.net.pk. Kull għajnuna tiġi apprezzata.

Fil-qasam tal-futball

Minn dawn il-kolonni ilna ftit ma nikkumentaw fuq l-isport favorit tal-Maltin speċjalment it-tim tal-futball ta’ NSW, il- Melita Eagles li ftit ilu ngħaqdu ma’ organizzazzjoni kbir taż-żagħżagħ, il- Police Community Youth Clubs (PCYC). Għalkemm l-għaqda Parramatta Melita Eagles Sports Club Ltd għadha teżisti u tiffunzjona iżda t-timijiet illum qed jilgħabu fil-kompetizzjonijiet tal-futball taħt l-isem ta’ PCYC Parramatta Eagles. Qiegħed isir attentat qawwi biex dan il-klabb jirbaħ lura l-appoġġ enormi li kellu fost il-Maltin. Fl-istaġun 2006, dan il-klabb għalaq ħamsin sena minn meta saret l-amalgamazzjoni bejn żewġ timijiet Maltin li fl-1956 ingħaqdu taħt l- isem ta’ Melita Eagles Utd biex kibru u saru wieħed mill-aqwa klabb tal-futball fl-iStat ta’ NSW.

Plakka kbira fil-Melita Stadium ta' Sydney tfakkar 50 sena

Id-diriġenti tal-PCYC li nefqu eluf kbar ta’ flus biex komplew jiżviluppaw il-Melita Stadium u ġabuh fl-aqwa tiegħu daħlu wkoll biex ifakkru dan il-klabb kbir fl- istorja sportiva tal-komunità Maltija. Għal dan il-għan qiegħed jiġi ppjanat ħajt storiku fil-Melita Stadium Hall biex ifakkar il-ħamsin sena ta’ storja glorjuża

li ħadet lil dan il-klabb u t-timijiet tiegħu fl-ogħla unuri u anke meta tfaċċaw l- agħar żminijiet. Kif tidħol fil-Melita Stadium li qiegħed f’South Granville ġiet imwaħħla pjanċa kbir bid-dawl li tfakkar il-ħamsin sena, sewwa sew meta saret l-għaqda bejn il-PCYC u l-Melita Eagles. It-timijiet dis-sena se jkun jilgħabu f’NSW Super League u diġà bdew jilgħabu xi logħbiet ta’ ħbiberija. Żaru wkoll il-belt ta’ Goulburn biex irawwmu l- futball f’dawk in-naħat. Il-kompetizzjoni ta’ l-istaġun 2008 ta’ NSW Super League se tibda fil-wikend tas-Sibt 29 ta’ Marzu u l-ewwel logħba tal-PCYC Parramatta Eagles hija kontra Rockdale City f’Rockdale Illenden Sports Centre. L-aħħar logħba ta’ ħbiberija se ssir fil- Melita Stadium kontra Sydney Olympic, it-Tnejn 24 ta’ Marzu fil-4 u 6 pm.