allmalta.com - Ahbarijiet mill-Awstralja

It-Tnejn, 21 ta' Jannar 2008

Aħbarijiet
mill-Awstralja

ma' Lawrence Dimech OAM J.P.
Għal aktar aħbarijiet mill-Awstralja aqraw The Maltese Herald
li tohroġ fl-Awstralja kollha kull nhar ta' Tlieta.

Dawk li jitfu n-nirien

Ħafna jaħsbu li dawk l-uffiċjali qalbiena li jagħmlu parti fil- Fire Brigade imorru fuq il-post tal-ħruq biex jitfu n-nar biss. Skond uffiċjal anzjan ta’ l-istazzjon ta’ Surrey Hills (qrib Melbourne) din mhix dejjem deskrizzjoni eżatta tax-xogħol li tagħmel il-Brigata għat-Tifi tan-Nar. Rick Gili, li twieled Malta 49 sena ilu, qalilna li mis-sena 2002 l’hawn, il-Metropolitan Fire Brigade salvaw madwar 85 persuna li n-nar ikkaġunalhom problemi mediċi kkawżati minn nirien. Dan għaliex huma jiġu mħarrġa x’għandhom jagħmlu f’kaz ta’ emerġenza medika hekk kif jaslu fuq il-post tal-ħruq.

Dan il-veteran fil-qasam tat-tifi tan-nar hu wieħed minn 23 oħra li jikkumbattu n-nirien li rċevew għarfien għall-qlubija u l- professjonaliżmu li wrew fit-traġedja traġika li saret fil-qalba tal-belt ta’ Melbourne fit-18 ta’ Ġunju tas-sena l-oħra.

Rick u tlieta minn sħabu ġew imsejjħa fuq il-post minħabba li xi membri tal-pubbliku ġibdulhom l-attenzjoni bid-daqq ta’ l- alarms. Meta waslu fuq il-post sabu tlett persuni skjerati ma’ l-art bi ġrieħi gravi.

Bħala l-uffiċjal anzjan, Rick Gili ta l-ewwel għajnuna lil Paul de Waard li kien għadu kemm intlaqat minn tir f’sidru. Rick immedjatament attendih u żammu milli jitlef iktar demm.

Huwa anke ta l-għajnuna meħtieġa lil Kara Douglas. L-avukat Brendan Keilar, it-tielet persuna li sfat vittma ta’ tiri, għalkemm ġie mogħti assistenza għal 45 minuta, xorta miet. It-tnejn l-oħra ġew salvati bl-intervent mediku immedjat ta’ l- uffiċjali tat-tifi tan-nar.

Rick Gili

Rick Gili li huwa Senior Station Officer mal-Metropolitan Fire Brigade huwa t-tieni tifel ta’ Charles minn Bormla (eks surġent fl-AirForce) u Rita (nee Schembri) minn Ħaz-Zabbar. Huwa emigraw minn Malta u waslu l-Awstralja bl-ajru fis-26 ta’ Settembru 1970. Il-familja Gili fil-preżent joqgħodu f’Ferntree Gully iżda damu joqgħodu f’Tullamarine Victoria għal 35 sena sħaħ.

Jekk tiltaqgħu ma’ stejjer bħal dawn speċjalment fejn jidħlu tfal ta’ l-emigranti għarfuni bihom.
Ikkuntatjawni bl-email lawdimech@optus.net.com.au.

Iktar suċċessi
għat-tenur Aquilina

Fl-aħħar tas-sena ktibna dwar il-mawra qasira f’Sydney tat- tenur Malti Joseph Aquilina għax skond tagħrif li kellna kien kanta biss fiċ-Ċentru Malti La Valette fil-Kunċert Annwali tal- Milied. Iżda sirna nafu li dan it-tenur, jum biss qabel il-kunċert f’La Valette, kien mistieden ukoll biex ikanta f’kunċert tal- Milied li sar fil-miftuħ f’Manly Oval fejn kanta żewġ arias mill- opera ma’ orkestra sħiħa. Kien hemm atmosfera la Awstraljana fejn madwar 3,000 persuna semgħu fil-frisk taż- żernieq, fost ħafna kantanti oħra, lil dan it-tenur Malti. Mhux magħruf għaliex ma ntqal xejn minn qabel dwar din id-dehra ferm importanti tat-tenur Aquilina f’Manly Oval fejn jidher li kienet suċċess kbir għar-reputazzjoni tiegħu.

Dawn iż-żewġ ritratti jfehmu aħjar dak li rridu ngħidu.

F’dawn l-aħħar ġimgħa fl-Awstralja kellna magħna ukoll lill- kantant magħruf Malti Renato li deher flimkien ma’ Alison White fil-Ballu ta’ l-aħħar tas-sena organizzat mit-Tarxien Annunciation Assoc ta’ NSW. Huma taw kunċert ieħor fil- Hamrun Club f’Marsden Park NSW kif ukoll fi Brisbane.

Għadu kemm tħabbar li ġej l-Awstralja George Puse Curmi fejn se jgħati diversi kunċerti f’dak li qiegħed jiġi msejjaħ “Farewell Performance by Charles Baby Face Curmi” li jiġi l- kuġin tiegħu. F’dawn il-kunċerti hemm il-ħsieb li jidhru ħafna membri tal-familja Curmi minn Sydney bħala tislima lil Baby Face.

Joseph Aquilina

Manly Oval

Minn Wollongong

Il-klabb tal-George Cross Falcons li jinsab fis-subborg ta’ Gringila (qrib il-belt ta’ Wollongong NSW) reġa’ kien attiv ħafna fiż- żminijiet ta’ qabel il-Milied. Huma organizzaw party għat-tfal tal-membri. Barra li kull tifel/tifla ngħatat rigal kien hemm ħafna ikel u logħob għat-tfal. Fl-aħħar tas-sena fl-istess klabb kien hemm okazzjoni oħra ferrieħa fejn għadd ta’ membri u viżitaturi oħra ħonqu s-sala prinċipali fost il-kant tad-DJ Charles Camilleri biex flimkien iħallu warajhom is-sena 2007. Ara r-ritratti.

Il-Maltin ta’ Queensland

L-istoriku Malti u ħabib tagħna, Mark Caruana minn Sydney qiegħed jikteb sensiela ta’ artikli f’The Maltese Herald biex jispjega sewwa fejn jinsabu l-Maltin f’dan il-kontinent ta’ l-Awstralja. Fl-iStat ta’ Queensland, skond kif jispjega ċ-ċensiment 2006 li għadu kemm ħareġ għall-pubblika, nsibu li fi Queensland hemm 2,777 Malti li twieldu f’Malta. Hemm biss 1,530 li jitkellmu bil-Malti. Għanda mbagħad 14,759 li ddikjaraw li huma ta’ dixxendenza Maltija. Il-Maltin fi Queensland huma konċentrati l-iktar f’Mackay fit-tramuntana fejn hemm 349 li twieldu f’Malta iżda bl-iktar Muniċipalità’ li għandha jgħixu fiha nies ta’ dixxendenza Maltija fejn hemm 2,669. Ħafna minn dawn huma wlied ta’ dawk il-pijunieri Maltin li telgħu lejn Mackay biex jaqtgħu l-kejn.

Fil-Gold Coast hemm ukoll 581 li twieldu Malta, 339 li jitkellmu bil-Malti u 2,216 ta’ dixxendenza Maltija. Lejn dawn in-naħat marru jgħixu ħafna Maltin irtirati li fittxew naħa sabiħa ħdejn il-baħar u x’hemm isbaħ mill-Gold Coast? Fin-naħat tal-belt ta’ Brisbane nsibu 423 li twieldu Malta u 2195 ta’ dixxendenza Maltija.