It-tenur Joseph Aquilina f’Sydney

 Minn Malta jkollna ħafna kantanti li jiġu jżuruna fl-Awstralja iżda ż-żjara tat-tenur Joseph Aquilina kienet xi ftit differenti. Mhux spiss li jkollna entertainers mill-kamp klassiku. Dan jista’ jingħad ukoll għal post fejn għażel li jmur ikanta. Skond rapport li deher f’The Maltese Herald għaċ-Ċentru Malti La Valette fi Blacktown NSW ukoll kien l-ewwel darba li nstemat mużika klassika almenu minn kantanti minn Malta għax it-tenur lokali ta’ nisel Malti Adam Scicluna kanta fis-sala ta’ La Valette.

Il-kumitat ta’ dan iċ-ċentru Malti għaqqad il-kunċert minn dan il-bravu tenur mal- kunċert soltu annwali tal-Milied u jidher li kien suċċess kbir meta madwar 300 persuna attendew u tpaxxew bil-kant ta’ dan it-tenur li għaraf ikanta kemm kompożizzjonijiet operistiċi u anke kanzunetti popolari. Il-kunċert fetaħ bi kliem ta’ merħba mill-President Gejtu Pace.

Fuq il-programm kien hemm wkoll il-kitarrista klassiku Phillip Bollinger kif ukoll l- entertainer Malti lokali Sam Mifsud. Kantaw ukoll il-kor ta’ La Valette taħt it- tmexxija tal-Mro Victor Florida u kien hemm kant ukoll minn Rachel Florida. Il- promotur ta’ dan il-kunċert kien Oreste Aquilina.

 Konnessjonijiet politiċi

 Qrajna li l-Kap ta’ l-Oppożizzjoni f’Malta, Dr Alfred Sant ha l-inizzjattiva mill-ewwel mumenti biex bgħat messaġġ ta’awguri lill Prim Ministru ġdid ta’ l-Awstralja, Kevin Rudd wara r-rebħa kbira li rnexxielu jagħmel fl-aħħar elezzjoni Federali (jiġifieri ma’ l-Awstralja kollha). Dr Alfred Sant għażel li jibgħat dan il-messaġġ lil Charles Muscat, ir-rappreżentant tal-MLP fl-Awstralja. Charles Muscat li joqgħod f’Canberra minnufih għaddieh lil Annette Ellis MP f’Parliament House, Canberra.

Il-ġimgħa l-oħra ktibt ukoll dwar il-konnessjoni Maltija fil-format tal-Parlament Federali l-ġdid u sibna li David Bradbury MP li għadu kemm rebaħ id-distrett ta’ Lindsay (naħat ta’ Penrith NSW) hu ta’ nisel Malti. Skond rapport f’The Maltese Herald insibu li omm dan il-politiku hija Maltija bl-isem ta’ Carmen Tedesco minn Ħaż-Żabbar. Emigrat lejn l-Awstralja mal- familja tagħha fl-1954. In-nanna ta’ David, Pauline ukoll twieldet f’Ħaż-Żabbar u nannuħ Anthony twieled tas-Sliema.
 
Missier David, John hu Awstraljan u żżewweġ lil Carmen Tedesco fl-1974. Kienu joqgħodu fis-subborg ta’ Fairfield NSW. David huwa t-t-tieni minn ħamest aħwa. Carmen Bradbury  (nee Tedesco)  żaret  Malta fl-2001/02 waqt li David Bradbury MP u martu Kylie kienu wkoll Malta għal qamar-il għasel fl-2001. David u Kylie għandhom erbat itfal, Anna, Helena, Rose u Nicholas.
 
David Bradbury huwa gradwat fil-liġi mill-Università ta’ Sydney u fil-preżent qed jispiċċa Masters of Law. Huwa jaħdem bħala avukat mad-ditta Blake Dawson Waldron.

David Bradbury MP serva bħal Kunsillier fil-Penrith City Council għal dawn l-aħħar tmien snin u darbtejn ġie elett bħala Sindku.

 L-aħħar tas-sena

 Is-sena 2007 kienet waħda impenjattiva ħafna fost l-Maltin ta’ l-Awstralja speċjalment meta fi spazju ta’ ftit xhur kellna, l- ewwel żjara mid-Deputat Prim Ministru Dr Tonio Borg u wara mill-Prim Ministru Lawrence Gonzi li wasal hawn b’kontinġent ta’ 13-il persuna. Iż-żewġ politiċi Maltin għamlu s-soltu dawra ma’ l-Awstralja u żaru lil ħafna komunitajiet. Iż-żewġ żjarat kienu importanti għax seħħew wara r-riformi li l-Gvern Malti ħabbar dwar iċ-ċittadinanza doppja fejn issa għandhom dritt għaliha mhux biss t-tfal ta’ l-emigranti iżda jekk tinżamm ir- rabta’ (link) anke l-ġenerazzjonijiet ta’ wara.

Il-Gvern Awstraljan, wara ħafna diskussjonijiet mal- komunitajiet ħabbar ukoll riformi kbar fiċ-ċittadinanza. L-iktar parti li laqtitna kienet dik li fiha reġa’ ta’ l-opportunità lil dawk l-Awstraljani/Maltin li kienu rrinunzjaw ċ-ċittadinanza Awstraljana li setgħu jerġgħu japplikaw għaliha. Dawn r-riformi meħuda miż-żewġ Gvernijiet waslu tant kemm saret pressjoni fuqhom u minn naħa ta’ l-Awstralja wara li saret inkjesta sħiħa mis-Senat. It-talba tal-Maltin quddiem is-Senat Awstraljan ġiet ppreżentata personali minn Lawrence Dimech, f’żewġ sessjonijiet differenti li saru f’Sydney u Canberra.

Fl-aħħar ħarġa ta’ The Maltese Herald dis-sena qrajna ħafna messaġġi speċjali kollha diretti għall-Maltin ta’ l-Awstralja. Kien  hemm  messaġġi  mill-Arċisqof Pawlu Cremona (dak ta’

 Nota u spjegazzjoni

 Fil-ħarġa tas-26 ta’ Novembru tajt rapport ta’ l-aħħar tislima li l-komunità’ Maltija tat lill-Konslu Ġenerali f’Sydney u lil Franco Farrugia tal-Bank of Valetta.
 
Dwar l-uffiċjali tal-BOV ikkumentajt li “ma nistax nifhem kif dawn l-uffiċjali jħalluhom daqstant snin fl-Awstralja (13-il sena f’dan il-każ).
 
Kif jiġri f’ħafna każijiet kien hemm min f’Sydney ipprova jnassas u dawwar din il-kritika tiegħi f’waħda personali kontra Franco Farrugia. Il-kritika kienet diretta mhux lejn l-individwu iżda lejn il-BOV. Ninsisti li mhux gust għal dawk l-uffiċjali li jdumu daqstant bogħod (għexrien ta’ snin) minn art twelidhom; jitfgħu l-ankri fl-Awstralja bil-familji u konnessjonijiet oħra u mbagħad f’ħakka t’għajn iridu jħallu kollox warajhom. Dan japplika l-istess għall-uffiċjali diplomatiċi Maltin li jżommuhom hawn snin kbar.

Ktibt b’dan il-mod għax isir ħafna tgergir minn wara l-kwinti. Kelli l-kuraġġ li nikteb dwar dan is-suġġett għax naf sewwa kemm kien hawn uffiċjali li ġew minn Malta li sofrew minn deċiżjonijiet li jaqblu biss għall-amministrazzjoni u mhux għall-ħaddiem.