allmalta.com - Ahbarijiet mill-Awstralja

It-Tnejn, 26 ta' Novembru 2007

Aħbarijiet
mill-Awstralja

ma' Lawrence Dimech OAM J.P.
Dawn l-aħbarijiet jidhru wkoll fil-gazzetta f'Malta "l-orizzont" (kull nhar ta' Tnejn) u
f'The Maltese Herald, il-gazzetta nazzjonali tal-Maltin fl-Awstralja.

Spiċċalhom iż-żmien

Ftit ġimgħa ilu ktibt dwar ir-resturant tal-Maltin bl-isem ta’ Café Valletta li għandna fil-qalba tal-belt ta’ Sydney, ħanut tassew modern li mhux jagħmel biss isem lill-propjetarji, Joe u Miriam Portelli (minn Għawdex) iżda lill-Maltin kollha. F’dan il-lokal għandek issib żewġ kwadri b’pittura ta’ xeni ta’ Malta speċjalment wieħed tal-belt Valletta. Kelli l-opportunità li mmur sa dan ir- resturant fl-okażjoni ta’ tislima li l- komunità Maltija ta’ NSW tat lill-Konslu Ġenerali Joanna Pisani u lil Franco Farrugia r-rappreżentant tal-BOV fl- Awstralja. Kien xieraq li “farewell” ta’ din il-kwalità jsir f’post ġdid fejn diġà sar ferm popolari mal-Maltin.

Joanna Pisani ġiet maħtura bħala l- ewwel Konslu Ġenerali mara f’NSW f’Lulju 2003 u jidher li waslilha ż-żmien biex tirritorna lura lejn Malta. Iż-żmien tagħha f’dan l-iStat diġà ġie mtawwal għal ħafna xhur u jidher ukoll li l-isem tal-persuna li ġejja flokha għadu ma tħabbarx mill-Ministru Michael Frendo. Ma tkunx l-ewwel darba li jħallu dawn il- postijiet Konsulari vojta għal żminijiet twal.

Madwar 50 persuna mlew l-Café Valletta biex jagħtu tislima u rringrazzjament speċjali f’okażjoni li kellha tkun għall- Konslu Ġenerali biss iżda f’daqqa waħda inbidlet bħala okażjoni wkoll għal Franco Farrugia u martu Nancy.

L-okażjoni speċjali fil-Café Valletta kienet organizzata mill-Kunsill tal-

Mix-xellug: Charles Galea-Soler, Franco u Nancy Farrugia, Charles Mifsud,
Joanna Pisani u Jessie Mifsud.

Komunità Maltija ta’ NSW u kienet immexxija minn Alfred Fenech. Sar diskors ta’ l-okażjoni mill-President Charles Mifsud u wara tkellmu wkoll uħud minn dawk li kienu preżenti b’ton ta’ ringrazzjament għax-xogħol li wettqu kemm Joanna Pisani u Franco Farrugia fost il-komunità Maltija. Kien hemm ukoll min ippreżenta xi rigali. Fl-aħħar tkellmu ż-żewġ mistiedna fejn irringrazzjaw lil kulħadd. Il-propjetarji ta’ Café Valletta lestew ikla la Maltija fejn ġie servut imqarrun il-form u stuffat taċ- ċanga.

Franco Farrugia tal-Bank of Valletta ilu fl-Awstralja madwar 13-il sena u issa

wkoll ġie msejjaħ lura. Ma nistax nifhem kif dawn l-uffiċjali jħalluhom daqstant snin fl-Awstralja. Żgur li l-BOV għandu jkollu regoli ferm iktar ġusti u ma jħallix persuni jservu barra għal daqstant żmien. Dawn iż-żewġ persuni ngħataw l- aħħar tislimiet minn bnadi oħra.

Mad-dħul tas-sena l-ġdida, il-BOV fl- Awstralja se jkollu uffiċjal rappreżentattiv ġdid. Charles Grech Soler mir-Raħal il- Ġdid ilu jaħdem mal-bank mill-1984 f’diversi karigi. Dan l-uffiċjal għandu Masters fil-Business Administration u huwa miżżewweġ lil Yvette nee’ Attard. Dan l-aħħar kienu joqgħodu f’tas- Sliema.

Il-Melbourne Cup

Kif jista’ jkun tiġrija taż-żwiemel twaqqaf nazzjon? Hekk hu! Din it-tiġrija taż-żwiemel li ssir kull sena fil-korsa sabiħa ta’ Flemington f’Melboune fl- ewwel Tlieta ta’ kull Novembru tant hija popolari fl-Awstralja li meta jasal il-ħin li tkun se tigri kulħadd, tfal xjuħ u x’naf jien jieqfu biex imsammrin ma’ l-iskrins tat-TV jew radju jkunu xhieda ta’ din it- tiġrija fenomenali.

L-iStat ta’ Victoria (Melbourne hija l-belt kapitali) tiddikjara btala speċjali għal jum tal-Melbourne Cup. Ħafna jgħidu li din it- tiġrija hija ferm iktar minn żwiemel jiġru wara xulxin iżda hija wkoll spettaklu ta’ moda għax il-korsa ta’ Flemington tiġbed lejha l-aqwa nies famużi fl- Awstralja u anke minn barra. Ikun hemm ukoll l-isbaħ nisa bl-iktar ilbies modern u tal-moda. L-irġiel xejn inqas għax jilbsu fl-aqwa tagħhom. Insomma spettaklu li għal jum jgħaqqad in-nazzjon Awstraljan f’ferneżija ta’ logħob ta’ l-azzard fuq iż- żwiemel stmat għal madwar $126 miljun.

Ir-rebbieħ tal-Melbourne Cup dis-sena kien iż-żiemel bl-isem ta’ Efficient. Sidu,

Melbourne Cup

Lloyd Williams ftit kellu bżonn il-premju ta’ madwar ħames miljuni għax diġà hu biljunarju. F’ żmien Williams kien is-sid tal-Crown Casino ta’ Melbourne. L-ewwel Melbourne Cup saret fl-1861. Dis-sena kien hemm biża’ qawwi li din l-aqwa handicap race fid-dinja li ssir quddiem folla ta’ 103,000 persuna kienet se titħassar jew posposta minħabba li fl-

Awstralja faqqet l-Equine Fluenza li kellha effett diżastruż fuq l-industrija taż- żwiemel speċjalment f’NSW. Jidher li din l-influwenza li ħakmet ħafna żwiemel ma daħlitx fl-iStat ta’ Victoria u għalhekk iż-żiemel ċampjin Efficient niżżel ismu fl-istorja tar-rebbieħa ta’ din it-tiġrija li twaqqaf zoptu lin-nazzjon Awstraljan, mank għal ftit minuti.

L-elezzjoni
fl-Awstralja

Sallum il-qarrejja ta’ din il-paġna jkunu diġà jafu kif ħasibha l-poplu Awstraljan fl-elezzjoni Federali li kellna jumejn ilu. Ġimgħa qabel l-elezzjoni kont qed naqra The Sydney Morning Herald, ġurnal li joħroġ kuljum f’NSW u sibt li Thomas Dimech ta’ sitt snin li jiġi t-tifel tat-tifel tiegħi Mark ġie mistoqsi għaliex kien preżenti fir-rally organizzat minn Nature Conservation Council of NSW fid-Domain ta’ Sydney li għalih attendew madwar 28,000 persuna. Dan ċ-ċkejken tifel mingħajr ħafna tlaqliq qalilhom “I want to save the planet”.

Missieru Dr Mark Dimech hu attivista prominent u t-tnejn kienu preżenti għal Walk Against Warming fejn il-folla imxiet minn Hyde Park għad-Domain fil-preżenza ta’ Peter Garrett u l-kap tal-Greens, Bob Brown. Malcolm Turnbull ma setgħax jattendi. Walk against Warming saru f’madwar 50 post differenti fl-Awstralja u fihom ħadu sehem iktar minn100,000 attivista.

Dr Mark Dimech u ibnu Thomas Lawrence