allmalta.com - Ahbarijiet mill-Awstralja

It-Tnejn, 19 ta' Novembru 2007

Aħbarijiet
mill-Awstralja

ma' Lawrence Dimech OAM J.P.
Dawn l-aħbarijiet jidhru wkoll fil-gazzetta f'Malta "l-orizzont" (kull nhar ta' Tnejn) u
f'The Maltese Herald, il-gazzetta nazzjonali tal-Maltin fl-Awstralja.

Ħamsin sena flimkien

Għalkemm kienet il-festa ta’ Agnes u Joe iżda ma hemmx dubju li kienu t-tfal tagħhom li kellhom fuq wiċċhom tbissima ta’ kburija u gratitudni. Agnes Vella (Tal-Pampalaw) ta’ 26 sena u Joe Camilleri (Ta’ Ġurina) ta’ 32 sena, it-tnejn mill- villaġġ sabiħ tal-Mellieħa żżewġu fis-Santwarju tal-Madonna fuq il-Għolja fis-27 ta’ Ottubru 1957 u ftit wara, kif kienu jagħmlu ħafna koppji miżżewġin friski dawk iż-żminijiet telqu l-Mellieħa fuq il-vapur m/v Aurelia destinati għall-belt ta’ Sydney. Joe kien idoqq il-klarinet mal-banda Imperial tal- Mellieħa kif ukoll kien idoqq missieru Ġammari. Ritratt tiegħu għadu sal-lum jinsab imdendel mal-ħajt fil-każin tal-Banda.

Mal-wasla tagħhom issetiljaw f’Horsley Park fejn bdew joperaw market garden u sal-lum, 50 sena wara għadhom

Ritratt taż-żwieġ ta' Joe u Agnes Camilleri

Joe u Agnes Camilleri

joqgħodu fl-istess dar fejn rabbew l-erbat itfal tagħhom, Maryanne, Pauline, Carol u Jim. Huma wkoll nanniet ta’ erba’ Thomas, Rachel, Emily u Henry. Joe Camilleri kien ukoll bandist mal-banda OLQP ta’ Greystanes.

Illum irtirati Joe u Agnes reġgħu ġeddu l-wegħdiet tagħhom taż-żwieġ quddiem il-kappillan tal-parroċċa u wara komplew jiċċelebraw f’restaurant imdawrin mal-familja u ħbieb. It-tfal tagħhom iddiskrevew din iċ-ċelebrazzjoni tal-Ġublew tad- Deheb bħala avveniment mill-aqwa u għażiż ferm għalihom għax jafu sewwa kif trabbew b’tant għożża u mħabba.

Il-koppja Camilleri rċevew l-isbaħ xewqat fl-okażjoni tal-50 anniversarju tat-tieġ tagħhom minn għand Chris Bowen MP, Il- Prim Ministru, il-Gvernatur Ġenerali u anke l-Papa Benedittu XV1 bgħat iberikhom. Irċevew xewqat u rigali minn ħafna mill- qrabat tagħhom minn Malta u l-Kanada li ma setgħux ikunu preżenti.

Kantanta żagħżugħa fl-Awstralja

Ftit kienu dawk li semgħu biha. Kantanta ta’ 16-il sena mill-Mosta li għamlet pass ta’ ġgant meta imbarkat fl- istess triq li waslet l-Awstralja lill- kantanti magħrufa Maltin bħal Mary Spiteri, Renato, Enzo Guzman u oħrajn. Il-kumpanija Teatrali Ċittadini ta’ NSW ppreżentaw lil Kimberly Grech għall- ewwel darba fil-Merrylands RSL Club. Din kienet l-ewwel darba li talent Malti għamel użu minn dan il-klabb.

Il-kantanta żagħżugħ ippreżentat it- talent tagħha quddiem sala mballata bin-nies (full house, madwar 400) u marret tajjeb ħafna speċjalment meta tikkunsidra l-eta’ tagħha. Il-vuċi melodjuża tagħha turi li Kimberly Grech għandha futur sabiħ fil-qasam tad-

divertiment. Fl-Awstralja Kimberly Grech kienet akkumpanjata minn omma Miriam u oħra ż-żgħira. Il-programm li dam sejjer madwar 4 siegħat u nofs beda mill-kantant lokali Joe Galea li bħas-soltu wera l-ħila tiegħu bħala wieħed mill-aħjar kantanti li għandna f’Sydney. Wara Iċ-Ċittadini ppreżentaw kummiedja brillanti “Il-Ġenn ta’ Veronica” taħt id-direzzjoni ta’ tad- direttur Greg Caruana li qalli li kien sodisfatt li skopra stilla oħra tal-kant b’Kimberly Grech.

Għal din is-serata kien hemm grupp li ġew minn Melbourne u magħhom kien hemm Charles (iż-Żiffa) Zammit u martu kif ukoll Louis Parnis, il-President tal-George Cross Falcons li ġab grupp miegħu ukoll minn Wollongong.

Kimberly Grech


Fir-ritratt jidhru l-awturi li ħadu sehem fil-kummiedja “Il-Ġenn ta’ Veronica”. Wara: Sara Borg, Monica Ledger, Joe Mifsud, Tessie Sciberras. Quddiem Doris Caruana u Joe Borg.		Fir-ritratt jidhru: mix-xellug: Charles Zammit flimkien ma’ Greg Caruana u Louis Parnis, il-President tal-George Cross Falcons Club ta’ Wollongong.

Firda fit-tagħlim tal-Malti

Wara għaxar snin ta’ ħidma sfieqa u suċċessi fit-tagħlim tal-lingwa u l-kultura Maltija f’Sydney inqala’ xi nkwiet u tħabbret li barra l-klassijiet li jmexxu l- Kunsill tal- Komunità’ Maltija ta’ NSW sar attentat biex jibdew klassijiet oħra separati fi Smithfield. Il-Maltese Language School of NSW (Skola Maltija) sa kienu taħt theddida li se jitilfu l-isimhom f’attentat li żvija kompletament iżda li ħoloq ħafna inkwiet u tilwim bla bżonn.

Meta kmieni f’Ottubru beda l-aħħar term skolaristiku ta’ NSW, il-Maltese Language School ta’ NSW komplew bil- klassijiet f’Seven Hills u reġgħu fetħu klassijiet f’Horsley Park fejn skond il- Prinċipal ta’ l-iskola Victor Vella MA qalli li madwar 60 student marru jirreġistraw u nfetħu tlett klassijiet.

Skond sorsi qrib il-Kunsill Malti jidher li l-kompetizzjoni ma kellha l-ebda effett

Studenti tal-Maltese Language School of NSW (Skola Maltija).

fuq il-klassijiet tagħhom anzi dawn żdiedu u ħeġġuhom biex għal sena oħra joħorġu b’kunċett innovattiv fejn l-

istudenti se jiġu mogħtija ferm iktar inċentivi biex ikomplu jitgħallmu l-lingwa u l-kultura Maltija.

Wirja ta’ l-isnooker

Numru mhux ħażin ta’ Maltin attendew fil-Marconi Club ta’ Sydney biex jaraw wirja mill-aqwa tal-logħba tas-snooker li fiha ħadu sehem iċ-ċampjins Malti, Alex Borg kif ukoll Simon Zammit, it-tieni l-aħjar plajer tas-snooker f’Malta.

Għal kemm din il-wirja ta’ klassi għolja fil-logħob tas-snooker ftit ġiet mogħtija pubbliċità iżda kienet sorpriża meta rajna daqstant Maltin u anke Taljani li attendew lejl sħiħ jammiraw il-ħila ta’ dawn iż-żewġ Maltin li kienu fl-aqwa tagħhom.

L-ewwel ma beda fuq il-mejda kien Alex Borg li huwa ċ- ċampjin ta’ Malta u l-Ewropa għas-snin 2005 u 2006. L- avversarju tiegħu kien Vinnie Calabrese li huwa ċ-ċampjin

Mix-xellug: Hassan Karde, Simon Borg, Pancu Deguara,
Simon Zammit u Vinnie Calabrese.

Alex Borg u Simon Zammit

nazzjonali Awstraljan għas-sena 2005. Il-Malti rebaħ finalment 9-4 f’żewġ sessjonijiet u wettaq l-ikbar break ta’ 109. Bejn dawn is-sessjonijiet prinċipali rajna wkoll wirja ta’ snooker bejn Simon Zammit u Hassan Kerde.

Kemm Alex u Simon waqfu fil-belt ta’ Sydney fejn għandhom xi qrabat qabel ma jkomplu fi triqthom lejn it-Taljandja fejn qegħdin fil-preżent jieħdu sehem fil-World Amateur Snooker Championship li se tispiċċa fil-25 ta’ Novembru 2007.

Alex Borg sab ħin wkoll biex iżur il-klassijiet tal-lingwa Maltija fl-iskola pubblika ta’ Horsley Park NSW fejn iltaqa’ ma’ l- istudenti u l-għalliema.