allmalta.com - Ahbarijiet mill-Awstralja

It-Tnejn, 30 ta' April 2007

Aħbarijiet
mill-Awstralja

ma' Lawrence Dimech OAM J.P.
Dawn l-aħbarijiet jidhru wkoll fil-gazzetta f'Malta "l-orizzont" (kull nhar ta' Tnejn) u
f'The Maltese Herald, il-gazzetta nazzjonali tal-Maltin fl-Awstralja.

Malti jagħmlilna unur f’ġirja ta’ strapazz kbir

Isejħulhom Iron Man u ma tridx tkun xipli biex tikkompeti fit-tiġrijiet hekk imsejħa triathlon. Mingħajr waqfien ta’ xejn bejn sessjoni u oħra hija kompetizzjoni ferm iebsa li taqsam tlett dixxiplini sportivi jiġifieri għawma ta’ 3.8 km, rikba fuq rota tul ta’ 144 km u ġirja tul ta’ 42.2km. Kompetizzjoni ta’ strapazz li għaliha jikkompetu atleti minn27 pajjiż (1337 irġiel u 278 nisa).

George Mifsud ta’ 40 sena, iben Charles u Jessie mis-subborg ta’ Burraneer NSW u ċittadin Malti jieħu sehem f’tiġrijiet simili fuq bażi regulari.

Fil-Ironman Australian Triathlon li saret f’Port Macquarie NSW ftit ilu George Mifsud irnexxilu jispiċċa f’ħin ta’ inqas minn 12-il siegħa. Mhux hekk biss iżda rnexxielu wkoll jiġbor $11,000 għall- karità għal K.I.D.S. Foundation liema somma għamlitu l-iktar kompetitur li irnexxilu jiġbor flus għal karità u għalhekk issa jirbaħ post fit-Triathlon li għandha ssir fil-Korea.

L-intenzjoni ta’ George Mifsud, li huwa membru ta’ Engadine Triathlon Club kienet li jipprova jirreġistra ħin aħjar minn

12-il siegħa u 19 minuta li ġera s-sena l-oħra. Fil-fatt f’ġirja impressjonanti f’Port Macquarie irnexxilu jnaqqas 30 minuta biex irreġistra 11-il siegħa u 49 minuta George Mifsud li huwa fil-preżent il- Human Resource Director mal-Compass Group u għamel żmien jaħdem f’Malta mal-Corinthian Group of Companies qalilna li jittrejnja bi sħiħ tant li jiġri fuq bażi regulari madwar 70 km, fuq ir-rota 450 km u jgħum madwar 12 km fil- ġimgħa. Dan l-atleta għandu wkoll l- appoġġ finanzjarju tal-Burraneer Wellness Clinic fl-attentati tiegħu biex jiġbor flus għal karità.

Charles, missier George qalilna li kien preżenti flimkien ma’ martu f’Port Macquarie u setgħu jaraw kemm hija diffiċli din il-kompetizzjoni li fiha jispuntaw id-dixxiplina, stamina u saħħa ta’ kull kompetitur. Il-kompetizzjoni bdiet fis-6.30 am bil-għawma, imbagħad dritt għal fuq ir-rota u fl-aħħar ġirja sħiħa.

Kien hemm madwar 2,000 voluntier biex jassistu għal din il-kompetizzjoni u l-belt ta’ Port Macquaire (popolazzjoni ta’ 35,000) jiġbed lejha madwar 10,000 viżitatur għal dan l-avveniment.

George Mifsud

Meta George Mifsud kien jaħdem f’Malta fl-2003/04 kien ħa sehem ukoll f’tiġrijiet simili. Fil-lista ta’ kompetituri f’Port Macquarie kien hemm ukoll Joe ta’ 54 sena u Luke Dimech ta’ 34 sena minn Greystanes NSW.

Dawk li servew
fil-gwerra

Il-fergħa Maltija tar-Returned Service League kienet fil- periklu li tagħlaq. Dawk il-Maltin li servew fil-gwerra illum kollha kbira fl-età u ftit minnhom għadhom attivi. Il-mewt ta’ żewġ pilastri ta’ din il-għaqda għal ħafna snin, is-surmast Joseph Darmanin mietu wkoll u n-numru ta’ membri naqsu ħafna. Sar appell qawwi biex jidħlu membri ġodda. Dan mhux dejjem hu faċli għax iridu jkunu skond l-obbligi ta’ l-RSL. Jidher li fil-Laqgħa Ġenerali Annwali li saret fir-Revesby Workers Club irnexxilhom ukoll jelegu kumitat sħiħ.

Fil-laqgħa mmexxija minn Jimmy Magro saru r-rapporti tas-soltu. Il-President, Jimmy Magro wera x-xewqa tiegħu li jgħaddi r-riedni lil ħadd ieħor. Fl-elezzjoni li saret dawk li ġew eletti kienu dawn:

President: Charles Mifsud, Viċi Presidenti: Anthony D’Anastasi u Jimmy Magro, Segretarju: Victor Zammit, Teżorier: Sam Vella. Trustees: Anthony D’Anastasi u Jimmy Magro. Ir-returning officer kien Alfred Fenech.

Wara l-elezzjoni, Alfred Fenech ġie appuntat Administrative Officer.

F’Melbourne ukoll għandna għaqda tal-Maltese Ex-Services Association of Victoria fejn waqt laqgħa annwali riċenti ġie elett Emmanuela Spiteri bħala President u Segretarju, Frank Bugeja bħala Viċi President, Immediate Past President Dr Edgar Gatt u Membri Joseph Flynn u Frank Muscat waqt li l- pożizzjoni ta’ kaxxier għadha vojta. Kuntatt ma’ din l-Għaqda bit-telephone 61 3 9338 3526.

Maltin veterani tat-tieni gwerra lesti biex jimmarċjaw fl-Anzac Day fil-bliet ta' f'Melbourne u Sydney. Il-kumitati ta' dawn iż-żewġ għaqdiet ġew eletti dan l-aħħar kif jidher f'dan ir-rapport.

Għotja skolastika

Il-Kummissjoni Għolja ta’ Malta fl-Awstralja għadha kemm ħabbret li wara li sar is-soltu proċess ta’ l-għażla permess ta’ intervisti fl-iStati ta’ Sydney, Adealide u Melbourne ġie magħżul Matthew Vella (ara ritratt) minn Randwich NSW bħala l- applikant għal dak li jissejjaħ Business/Professional Traineeship/Scholarship. Dan il-Malti nstablu post ukoll mal-Heritage Management Unit fil-Malta Environment and Planning Authority ta’ Malta.

Matthew Vella għandu Masters Degree fil-Heritage Conservation mill-Università ta’ Sydney. L-intenzjoni tiegħu hi li kemm idum Malta mal-MEPA se jistudja u jiżviluppa modi kif Malta tista’ tħares aħjar l-assi li wirtet li tant huma prezzjużi. Il- passaġġ bl-ajru għal din l-għotja skolastika li jestendi għal sitt xhur bejn Marzu u Settembru 2007 ġie mħallas mill-uffiċċju tal-Bank of Valletta fl-Awstralja

Matthew Vella

Ktieb ieħor ġdid

Nieħu gost nagħti pubbliċità lil dawk il-Maltin li jagħmlu isem għalihom meta jkunu resident barra minn Malta. Connie Anderson (ritratt) twieldet il-Marsa u għalhekk kunjom ta’ xebba kien Teeling iżda hija Maltija. Kienet qed tgħum fil- bajja ta’ San Ġorġ meta ltaqgħet ma’ suldat Ingliż u żewġitu f’Malta fl-1969.

Il-faċċata tal-ktieb

Telqet karriera bħala għalliema fl-iskejjel primarji f’Malta u ma’ żewġha ġew stazzjonati f’ħafna pajjiż differenti. Ilhom jgħixu f’Devon fl-Ingilterra għal ħafna snin iżda spiss iżuru Malta.

Connie Anderson kitbet l-ewwel ktieb tagħha b-isem ta’ The Maltese House with the Bright Yellow Door novella dwar karattri Maltin fuq sfond Malti. F’ħafna partijiet tal-ktieb tista’ tinduna li huma meħuda mill-esperjenzi ta’ ħajjitha.

It-tieni ktieb tagħha jkompli fejn ħalla l- ewwel wieħed taħt l-isem ta’ The House in Cedar Avenue b’Amelia il-karattru prinċipali.

Mill-ġdid l-istorja titbandal bejn lokalitajiet f’Malta u oħrajn fl-Ingilterra. Għal dawk familjari ma’ l-ewwel ktieb, The House on Cedar Avenue jlaqqa’ mill- ġdid lil Ġina ma’ Jim u hawn tisponnta l- ġelusija ta’ martu għax deher li kien għadu jħobb lil Ġina, it-tfajla Maltija li kien ħabb meta kien stazzjonat Malta.

Storja tassew ta’ kobba mħabbla f’kull paragrafu. Il-fatt li l-istorja tiżvolġi fit- toroq u d-djar f’Malta tagħmel dan il- kiteb favorit ma’ ħafna Maltin. Biex il-

Connie Anderson

qarrejja lejali lejn il-kitba ta’ Connie Anderson jagħmlu kuraġġ, din l-awtura qaltli li diġà bdiet taħdem fuq it-tielet ktieb tagħha b’istess tema.

Connie Anderson dan l-aħħar irnexxilha tippubblika wkoll kollezzjoni ta’ poeżiji li kitbet dan l-aħħar li dehru fil-ktieb ta’ Jay Jerome “Magic Moments”. Jekk tridu takkwistaw kopja tal-ktieb The House on Cedar Avenue idħol online:

http://www.pegasuspublishers.com/ (fiction general).