Ahbarijiet mill-Awstralja

It-Tnejn, 16 ta' April 2007

Aħbarijiet
mill-Awstralja

ma' Lawrence Dimech OAM J.P.
Dawn l-aħbarijiet jidhru wkoll fil-gazzetta f'Malta "l-orizzont" (kull nhar ta' Tnejn) u
f'The Maltese Herald, il-gazzetta nazzjonali tal-Maltin fl-Awstralja.

Strateġija innovattiva għall-iskola tal-Malti

L-iskola tal-Malti ta’ NSW dejjem kellha nuqqas ta’ għalliema kkwalifikati u għalhekk ħasbu biex jifformolaw kampanja bi strateġija ġdida biex jattiraw għalliema tal-Malti speċjalment minn fost dawn li għadhom kemm waslu fl-Awstralja. Dan l-aħħar qegħdin jaslu għadd mhux ħażin ta’ Maltin li ħafna minnhom huma mħarrġa f’livell terzjarju u ta kwalifika. Għalkemm mhux neċessarjament fit-tagħlim tal-Malti iżda ma hemmx dubju li dawn l-emigranti ġodda jistgħu jagħtu skoss ‘l quddiem lill-iskola tal-Malti għax huma ta’ professjoni.

Din l-istrateġija kienet immexxija minn Rhonda Balzan, is-segretarja ta’ l-iskola u ħabrieka ħafna għat-tagħlim tal-Malti għalkemm hi stess imwielda l-Awstralja.

Skond ma qaluli kien hemm 11-il applikazzjoni għad-diversi avviżi li saru. Saret laqgħa speċjali għal dawn l- aspiranti ġodda fejn kellhom l-opport- unità li jiltaqgħu mad-diriġenti ta’ l-iskola u anke ma’ għalliema kurrenti.

Il-ħtieġa li jinfetħu klassijiet oħra fl-inħawi ta’ Nepean, Wollongong, Richmond u fil- qalba tal-belt ta’ Sydney ġew diskussi. Il-prinċipal ta’ l-iskola Jane Borg (li bħal issa tinsab Għawdex fi btala) spjegat l- istruttura tal-klassijiet skond id-direzzjoni ta’ NSW Board of Studies.

Din il-laqgħa speċjali wriet li hemm enerġija ġdida għat-tagħlim tal-Malti li qed jinxtered fuq ħafna ġenerazzjonijiet u joħloq interess qawwi. L-aħħar żjara speċjali li għamel il-Ministru Tonio Borg fejn ġab miegħu għadd ta’ kotba għat- tagħlim tal-Malti li għadhom ħarġu f’Malta ta’ spinta wkoll għax jidher li l- Gvern ta’ Malta wkoll fl-aħħar qed jinduna bl-isforzi li qegħdin isiru fl- Awstralja.

Skond Rhonda Balzan qed isiru preparamenti biex isir Konferenza Nazzjonali fit-30 ta’ Settembru fil-belt ta’ Canberra għal dawk interessati fit-

Uħud minn dawk li attendew laqgħa speċjali ta' l-Iskola tal-Malti.

Uħud minn dawk li attendew biex jitħajru jgħallmu l-Malti f'NSW.

Għalliema u oħrajn li jridu jgħinu l-iskola tal-Malti f'NSW.

tagħlim tal-Malti. Fl-istess ġranet f’Canberra se jkun hemm konferenza ta’ l-Australian Federation of Community Languages. Dan l-aħħar ukoll il-Kunsill Malti ta’ NSW irregala ċertifikati ta’ ringrazzjament għall-istudenti li ġabu l- HSC fil-Malti fl-aħħar tas-sena 2006.

Dawn kienu Rosemary Hadarin, Sarah Barbara u Mary Goding. Iċ-ċertifikati ġew mgħotija mill-Ministru Borg meta żar l-iskola tal-Malti f’Seven Hills NSW. Ingħata ċertifikat ukoll lil John Borg li għamel ħafna snin ċermen ta’ l-iskola tal-Malti.

Festa ta’ Don Bosco

Il-festa ta’ Don Bosco ġiet iċċelebrata f’Sydney ukoll b’quddiesa u purċissjoni organizzata mill-Għaqda tat-Tfal ta’ Dari ta’ dan il-qaddis li huma attivi sewwa fil-qasam ta’ ġbir ta’ flus għal-karità fl-Awstralja.

Iċ-ċelebrazzjoni saret fil-knisja tant għal qalb il-Maltin li hemm fis-subborg ta’ Horsley Park għad-unur tal-Vitorja. Fr Carmelo Sciberras, Fr J. Briffa u Fr Claude Borg ħadu sehem.

Wara l-quddiesa kien hemm purċissjoni bl-istatwa ta’ San Bosco, tkantaw innijiet u ġie rreċitat lużarju. Wara kulħadd mar fis-sala antika tal-knisja fejn kien hemm riċeviment. Il- President ta’ l-Għaqda Don Bosco, Joseph Fabri rringrazzja lil dawk kollha li attendew għal din il-festa annwali tal-padrun.

L-istatwa ta' Don Bosco fil-festa tiegħu f'Horsley Park NSW.

Unur ieħor għal Alfred Fenech

Alfred Fenech

Alfred Fenech, wieħed mill-veteran tal-komunità Maltija f’NSW kompla jiġi mogħti għarfien għax-xogħol tiegħu fost il-komunità ġenerali meta waqt il-laqgħa ġenerali annwali tal-Beethoven Society of Australia li saret f’Sydney hu ġie onorat bħala membru għal għomru b’vot unanimu.

Il-Beethoven Society għandha kor magħruf sewwa li jkanta f’ħafna attivitajiet kbar f’NSW bħall-Opera House u Town Hall. Il-kor ħa fama internazzjonali u kanta f’ħafna bliet kapitali ta’ l-Ewropa kif ukoll fiċ-Ċina u l-Ġappun. Alfred Fenech serva bħala President, Viċi President u membru tal-Kumitat għal ħafna snin u organizza żjarat għal dan il-kor f’Malta fejn kantaw fil-Teatru Manoel, fiċ-Ċina u l-Ġappun. Kien Alfred Fenech li ressaq lejn is-Soċjetà lil Hon John Aquilina MP li wara ħatruh Patrun u kien responsabbli wkoll li jagħmlu użu għat-taħriġ tagħhom fis-sala tad-Dipartiment ta’ l-Edukazzjoni.

Alfred Fenech huwa wkoll ‘life member’ tal-Kunsill Malti ta’ NSW, ‘foundation’ u ‘life member’ tal-Australian-Maltese Chamber of Commerce, tal-Maltese Past Pupils of Don Bosco u ‘life member’ ta’ l-Addison Road Community Centre’. Huwa wkoll ġie onorat bil-OAM (Order of Australia Medal), l-ewwel wieħed mill-Kommunità Maltija f’NSW li rċieva unur taħt l-Australian Awards.

Unur mistħoqq

Jimmy Magro, il-President tal-Fergħa Maltija ta’ l-RSL, ġie mogħti ċertifikat ta’ kommendazzjoni mill-Gvern Statali ta’ NSW għall-ħidma tiegħu fil-komunità Maltija ta’ NSW speċjalment fost l-ex-servicemen Maltin.

Jimmy huwa membru fundatur tal-fergħa, Maltese RSL Sub Branch, li ġiet iffurmata f’Awissu tal-1960. Minn dak iż-żmien ‘l hawn dejjem ħadem għall-ġid tal-membri u Maltin oħra li kellhom il-bżonn l-għajnuna tiegħu u tal-fergħa.

Anki issa f’età avvanzata meta saħħtu ma tantx għada tajba, għadu jieħu ħsieb din il-fergħa u ma sħabu jirsisti biex il-Maltin jieħdu sehem fit-tifkira ta’ l-ANZAC Day.

Jimmy Magro ġie nnominat għal dan l-għarfien mill-Maltese Welfare (NSW) Inc fuq talba mill-Kunsill Malti ta’ NSW.

Iċ-ċertifikat ħareġ mill-Community Relations Commission (CRC ) b’kitba ‘Certificate of High Commendation in Recognition of Outstanding Contribution to the Community of New South Wales’. Iċ-ċertifikat huwa ffirmat mill-Premier Morris Iemma u ċ-ċerman tas-CRC, Stepan Kerkyasharian.

Jimmy Magro kien mistieden biex jirċievi ċ-ċertifikat fill- Parlament House iżda ma kienx f’saħħtu biżżejjed biex jattendi.

Nifirħu sinċerament lil Jimmy Magro wieħed mill-veterani tal-komunità Maltija għal dan l-unur. Fis-sena-2004 kien ġiet mogħti wkoll Il-Quiet Achiever Award mill- Maltese Welfare (NSW).

Jimmy Magro

Ġimgħa l-Kbira bix-xita

Il-purċissjoni tal-Ġimgħa l-Kbira li ssir kull sena fil-knisja ta’ Horsley Park f’NSW ġiet imħassra fl-aħħar mumenti meta bdiet nieżla x-xita. Mijiet ta’ Maltin li kull sena jmorru għal din il-purċissjoni anke minn Stati oħra ħarġu diżappuntati iżda wisq iktar kienu l-organizzaturi li tant jaħdmu biex jippreżentaw din id-dimostrazzjoni tal-Fidi li tant saret popolari mhux biss mal-Maltin iżda mal-komunità ġenerali. Iċ-ċelebrazzjonijiet ta’ ġewwa l-knisja saru xorta u kien hemm għalihom knisja ppakkjata. Dawk li marru setgħu japprezzaw it-tmien vari li juru l-ħajja u l-mewt ta’ Ġesù li kienu esibiti fil-knisja lesti biex jagħmlu d-dawra annwali tas-soltu.

Fis-subborg ta’ St Albans f’Melbourne fejn il-Maltin ukoll huma nkarigati mill-purċissjoni tal-Ġimgħa l-Kbira qaluli li kellhom temp sabiħ u il-purċissjoni ħarġet u reġgħet kien suċċess b’eluf ta’ nies jaraw din il-pageant annwali li tant għandha eruq fil- kultura reliġjuża ta’ Malta.