|
Jiena tlaqt minn Malta fl-1952 fl-età ta’ wieħed u
għoxrin sena. Dak iż-żmien Malta kien għada
fir-rovini li ħallietilna t-tieni gwerra tad-dinja;
l-opportunità biex wieħed irabbi familja ma kienetx
sabiħa. Meta l-bniedem jasal f`dik l-età aktar iva
milli le jibda jaħseb biex jiżżewweġ, u hekk kienet
l-istorja tiegħi. Kont għarus, qliegħ ta flus ma
kienx hemm ġo Malta, allura ddeċidejt li nsiefer
biex infaddal ftit flus imbagħad nerġa’ lura lejn
Malta u niżżewġu; fil-fatt hekk ġara; dan sar billi
jien u l-għarusa qbilna f`dan il-pjan.
Dak iż-żmien dawk li kienu qed isiefru kienu jagħmlu
kuntratt mall-gvern ta Malta li ma jmorrux lura lejn
Malta qabel sentejn u jħallsu xi ħaġa żgħira
mill-passaġġ u l-kumplament iħallsu l-gvern u hekk
kien fil-kas tiegħi ukoll. Kien fix-xahar ta Ġunju
meta tlaqt minn Malta, il-vjaġġ fuq il-vapur kien
sabiħ ħafna, domna tnax il-ġurnata fuq il-baħar;
wasalna New York u minn hemm ħadt it-train
għal-Toronto, kien fil-għaxija, l-għada fil-għodu
wasalt Toronto. Jien ma kellix min jiġi minni
l-Canada, imma kelli ħabib u ġie jilqani hu.
Waqt li kont New York ma ndannajtx bil-kobor
tat-toroq għax ħsiebi kien f`Toronto, kif ser insib
lil-ħabib biex jilqani, imma meta dak kollu rnexxa u
bdejt ħajti f`pajjiż hekk kbir rajt id-differenza
mill-pajjiż li ħallejt warajja," Malta". M`għandniex
xi ngħidu l-ewwel ħaġa li nnotajt kienu t-toroq,
x`wisa ta’ toroq, il-bankini wesgħin tgħaddi karozza
mini minor, imbagħad fuq kollox l-ikel. Aħna Malta
konna nieklu aktar ħobż mill-ġwies li jmur miegħu,
hawn għal-kuntrarju, ħobż mill-anqas u ħafna ġwies.
Jien issa ili ngħix fil-Kanada aktar minn erba’ w
ħamsin sena, u nizzi ħajr l`Alla ma nistax
inmaqdarha, u r-relattivi tiegħi li ġibt hawn, jew
biex ngħid is-sewwa għax jien ma tellajthomx kollha,
imma jien ftaħt il-bieb, ħadd minnhom ma jgerger
għax ġew hawn.
Malta kienu jgħidu li fil-Kanada tagħmel ħafna kesħa
fix-Xitwa, u kollox jiffriża, u hekk hu veru, imma
fis-Sajf tagħmel ħafna sħana wkoll. Il-Kanada hija
l-akbar art tad-dinja, u minn naħa għall-oħra ssib
li fl-istess żmien t-temperatura hija differenti,
avolja l-istaġuni huma l-istess.
Jiena kif qed taraw, anke wara dawn is-snin kollha
hawn, il-Malti qatt ma nsejtu, u għalkemm ma nżurx
Malta ta sikwit imma lill-Malta xorta bqajt inħobbha
u qatt ma sejjer ngħid kontriha għax dik hija art
twelidi. |
