Jekk naqraw il-faċċati tal-aħħar ħarġa għas-sena 2010 tal-Maltese Herald, il- ġurnal nazzjonali li joħroġ kull ġimgħa fl- Awstralja, insibu diversi messaġġi mill- kapijiet politiċi u reliġjużi ta’ Malta kollha immirati lejn il-Maltin li jgħixu Barra speċjalment lejn l-Awstralja fejn hawn il- maġġoranza ta’ dawk li ħallew il-kenn tas-swar Maltin biex fittxew futur aħjar milli setgħet tonfrilhom Malta.

Ta’ kull sena, u speċjalment meta jiġu jżuruna l-kapijiet Maltin, joħroġ minn fommhom u mill-pinna tagħhom ftaħir (kulltant esaġerat) lejna li ngħixu hawn. Iżda bejn il-verità u l-fatti hemm baħar x’jikkumbatti

X’ma qalulniex fil-messaġġi tal-Milied il- kapijiet Maltin? Aħna nagħmlu parti integrali min-Nazzjon Malti. Qalulna kemm huma kburin bis-suċċessi li niksbu fl-artijiet barranin. Qalulna kemm japprezzaw dak kollu li nagħmlu daqs li kieku qed nagħmluh f’Malta u Għawdex. Sa anke qalulna li raw id-demm Malti u Għawdxi jbaqbaq meta ġew jarawna.

Wara din l-ewloġija kollha, ejjew naraw kemm hemm sinċerità f’dak li kontinwament jgħidulna bil-fomm u bil- kitba. Għal darba oħra dis-sena meta ġew biex jiġu jitqassmu l-unuri ta’ Ġieħ ir- Repubblika  ma sabu l-ebda Malti/Maltija ta’ Barra li kien ħaqqu dan l-unur.

Bl-ebda mod u manjiera m’hu qiegħed inċaħħad  jew  imbaxxi  l-unuri lill-Maltin li jgħixu Malta kisbu bl-għaraq ta’ ġbinhom anke jekk is-suċċessi kisbuhom immelsa mill-kenn ta’ art twelidhom.

Meta niġu għal fatti, kif jgħid il-Malti, bogħod mill-għajn bogħod mill-qalb.

Huwa fatt li għandna Maltin li jgħixu barra minn Malta daqs kemm, jekk mhux ikbar, mill-popolazzjoni tal-Gżejjer Malti. Possibbli allura li ma nstabx xi tali jew talija li ħaqqu Ġieh ir-Repubblika speċjalment meta nafu kemm hawn Maltin li jgħixu barra li jaħdmu qatigħ taħt diffikultajiet ferm iktar diffiċli minn dawk f’Malta biex jgħollu ġieħ il-pajjiż li ħallew warajhom?

Xi żmien ilu kont ipproponejt li fi ħdan Ġieħ ir-Repubblika ikun hemm sezzjoni speċifika għall-Maltin li jgħixu Barra almenu sakemm dawk li jmexxuha jibdew jifhmu aħjar x’irridu nfissru bil- kunċett ta’ “Malta Akbar”.

Kieku dan il-kunċett hu ħaj u mifhum verament kieku ma jkunx hemm sena li jħallu barra kompletament l-għarfien mistħoqq lejn il-Maltin li jgħixu Barra. F’Jum ir-Repubblika, meta n-nazzjon Malti jaqsam ir-ringrazzjament uffiċjali tiegħu,   ma  għandu  jkun  hemm  l-ebda

Fl-editorjal ta’ The Maltese Herald tat-30 ta’ Novembru kien hemm kumment floku li wara tmien xhur kien għandu ma sar xejn dwar il-wegħda tal-Ministru Dr Tonio Borg li kien għamel fil-Konvenzjoni li se jwaqqaf Istitut Kulturali Malti biex jippromwovi l- lingwa u l-kultura fost il-Maltin li jgħixu barra minn Malta.

Il-Ministru Borg, fil-ħarġa tal-14 ta’ Diċembru fl-istess gazzetta wieġeb billi kiteb li fil- fatt nhar l-4 ta’ Novembru 2010 kien ħabbar fil-Parlament li l-Kunsill għall-Maltin ta’ Barra kien se jitwaqqaf b’liġi. Ma hemmx dubju li hija ħaġa tajba li dan il-Kunsill se jitwaqqaf bħala istituzzjoni pubblika. Il-Ministeru tal-Affarijiet Barranin għandu rappreżentanza qawwija fl-Awstralja u għalhekk xtaqna li aħbar hekk importanti nkunu nafu bih mill-ewwel u mhux nistennew lill-Ministru jwieġeb editorjali ta’ The Maltese Herald.

Nistennew ukoll li kif intqal mill-Ministru sakemm il-liġi tiġi diskussa fil-Parlament Malti, aħna l-Maltin ta’ Barra jkollna l-opportunità li nagħtu l-kontribut tagħna wkoll billi nkunu nafu eżatt xi skopijiet se jkollu dan il-Kunsill. Il-Maltin ta’ Barra speċjalment dawk tal-Awstralja huma servuti minn diversi Kunsilli (jiġifieri umbrella ta’ għaqdiet), għandna l-Federation of Maltese Language Schools u issa wkoll il- Federation of Maltese Living Abroad. Dan barra l-uffiċini uffiċjali tal-gvern Malti. Ikun tajjeb għalhekk li ma jkollniex duplikazzjoni u wisq iktar noqgħodu attenti li ma noħolqux imperi biex iktar jisservew xi rjus kbar u prużuntużi milli biex jinkiseb b’effett u determinazzjoni t-tixrid tal-kultura Maltija u jissaħħaħ verament il-kunċett ta’ Malta Akbar.