L-ewwel aspett pożittiv li ħareġ mill- Konvenzjoni għall-Maltin ta’ Barra li saret f’Malta f’Marzu 2010 hu l-attentat li qiegħed isir biex ikollna Federazzjoni li tirrappreżenta lill-Maltin li jgħixu barra. Għaxar snin ilu, fil-Konvenzjoni tas-sena 2000 kienet ukoll ġiet imwaqqfa l- Federation of Maltese Abroad iżda din l- għaqda ftit jew xejn għamlet impatt u bagħat agunija għal għaxar snin sħaħ.
 
Id-delegati li attendew il-Konvenzjoni 2010 qablu li tiġi ffurmata bħal kummissjoni żgħira biex tiġbor nominazzjonijiet għal dawk li huma nteressati biex jidħlu għar-rwol tassew diffiċli biex jiffurmaw is-sisien ta’ din il-Federazzjoni ġdida li mank għad għandha isem. Id-delegati ddeċidew li l- isem FOMA għandu jinbidel għax hu assoċjat ma’ ħafna nuqqasijiet passati.
 
Il-kumitat il-ġdid taħt il-Presidenza tal- Prof Maurice Cauchi (Melbourne) huwa ffurmat minn Edwin Bonello, Edwidge Borg, Damien Digby kollha minn Melbourne, l-Awstralja, Catherine Grech minn Sydney u Louis Parnis minn Wollongong l-Awstralja, Claudia Caruana u Mona Nicholas-Vella mill-USA, Franklin Mamo mill-Belġju, Bernard Xerri mill-UK u Albert Vella mill-Kanada.

Dan il-kumitat issa se jibda jaħdem biex jifforma kostituzzjoni li tkun b’xi mod aċċettata mill-għaqdiet u l-Kunsilli li huma attivi fil-pajjiżi fejn hemm jgħixu l- Maltin. Din mhix se tkun xi ħaġa faċli għax il-Maltin li jgħixu f’pajjiżi differenti għandhom l-użanzi differenti tagħhom u ħafna drabi hemm bejniethom nuqqas serju ta’ qbil.
 

Waħda mill-ikbar problemi li nara biex jintlaħaq ftehim dwar it-twaqqif fuq sisien sodi ta’ din il-Federazzjoni ġdida hu l- mod kif se tiġi strutturata r-regola tad- dħul tal-membri f’din il-Federazzjoni.
 
Daż-żmien, il-komunikazzjoni saret ferm iktar faċli minn qabel u anke jekk għandek dawk id-distanzi kollha xorta jista’ jkun hemm ko-ordinazzjoni. Fil- Professur Maurice Cauchi hemm persuna li tista’ taspira fiduċja li kull ma jsir ikun għall-ġid tal-Maltin ta’ barra iżda mhux kulħadd jaqa’ fl-istess baskett ta’ dan l-istudjuż Malti.
 
Nittama li din id-darba, din il-Federazzjoni mhux biss tingrana iżda tikseb suċċessi wkoll għall- benefiċċju tagħna li ninsabu ngħixu barra pajjiżna.