Dan ifisser li dħalna fit-tielet ġenerazzjoni ta’ żgħażagħ. Tisma’ ħafna jargumentaw li l-għaqdiet Maltin huma kkontrollati minn persuni mdaħħla fi-żmien. Naħseb li l-maġġoranza ta’ l- għaqdiet Awstraljani u anke f’Malta l-maġġoranza ta’ l-għaqdiet huma mmexxija minn nies avvanzati fl-eta’ u li għandhom esperjenza tal-ħajja.
 
Ħafna jargumentaw ukoll li dawk li jmexxu l-għaqdiet ma jridux jagħtu ċans liż-żgħażagħ. Jista’ jkun dan, iżda mill-esperjenza tagħna dawn huma każijiet iżolati. Sa fejn nafu aħna l-għaqdiet Maltin   kollha  huma  mmexxija  b’mod  demokratiku  fejn  kull membru għandu d-dritt tal-vot u wisq iktar id-dritt li jservi fil- kumitat jekk ikollu l-appoġġ tal-membri.
 
Iva, din hija d-demokrazija li ngħixu fiha. Ma jfissirx li għax tippretendi li int “żagħżugħ” allura għandek tikkmanda u int biss għandek monopolju fuq l-“għerf”. Kulħadd, f’atmosfera demokratika għandu jagħmel l-apprentistat tiegħu. Jekk int persistenti u ta’ rieda tajba u għandek x’toffri b’mod pożittiv żgur li ħadd mhux se jirrifjuta l-għajnuna tiegħek. Dawk li jgħidu bil-kuntrarju ħafna drabi, l-argument tagħhom huwa zopp.
 
L-ikbar rigal li l-komunità attiva Maltin ħalliet bħal wirt kbir u importanti lil dawk li ġew warajna hija l-kruċjata konsistenti għal dawn l-aħħar kważi erbgħin sena biex akkwistajna mill- Gvern ta’ Malta ċ-ċittadinanza doppja mhux għalina biss iżda għat-tfal tagħna u għall-ġenerazzjonijiet ta’ wara wkoll”.
 
L-editorjali kien itwal u qed nikkwota parti minnu għax naf li ħafna mill-bulijiet tal-komunità mank jixtru din il-gazzetta u forsi xi ħadd issa jgħaddilhom dawn il-kummenti b’emejl.
 
Ma rridux li jkun hemm qasma bejn iż-żgħażagħ u x-xjuħ. Irridu li dawn jimxu flimkien, fejn l-entużjażmu, ideat ġodda u l-esperjenza jaħdmu id f’id. Min jipprova jaqsam jista’ jkollu mottivi oħra. Naf ħafna Maltin li joffru ħafna opinjoni u jgħidulek b’ħafna elokwenza għaliex ma jridux jindaħlu iżda meta tanalizza dak li jgħidu, tinduna li dawn fil-fatt ma jridux iħammġu idejhom bi ftit xogħol attwali fil-komunità anke meta xi wħud minnhom approfittaw ħafna mill-komunità Maltija.