Ahbarijiet mill-Awstralja

Aħbarijiet mill-Awstralja

ma' Lawrence Dimech OAM J.P.

Għal aktar aħbarijiet mill-Awstralja aqraw The Maltese Herald
li toħroġ fl-Awstralja kollha kull nhar ta' Tlieta.

It-Tnejn, 11 ta' Jannar 2010

Nuqqas serju

Ma’ l-Awstralja kollha għandna programm fuq l-SBS TV ta’ kull nhar ta’ Ħadd li nirċievu mill-PBS (Malta). Kemm-il darba ħassejt il-ħtieġa nikkummenta dwar dawn il-programmi. Programmi, li f’din is-sena li għaddiet tjiebu tassew, qegħdin jaslu regulari u mingħajr id- dewmien ta’ qabel. Nhar il-Ħadd, 27 ta’ Diċembru flok is-soltu aħbarijiet kien hemm programm speċjali tul il-programm kollu dwar il-proġett ġdid u sabiħ ta’ Pjazza San Ġorġ fil-Belt Valletta. Kien programm ferm informattiv u daħal fil-fond sa anke semma’ l-arloġġ tal-Main Guard, l-għotja tal-George Cross u dettalji oħra. Rajna ukoll dawk idoqqu t-tnabar u dawk mdendla u marbutin mis-sema jaqbżu minn naħa għal oħra.

Ma nafx għaliex, u dawn l-affarijiet iweġġgħuni ħafna, min ippreżenta dan il- programm naqas serjament li jsemmi li f’din il-pjazza kien hemm il-monument tas-Sette Guigno li jfakkar l-unika

rivoluzzjoni li qatt kellha Malta fis-7 ta’ Ġunju 1919 u l-erba’ eroja qalbiena Maltin li ġew maqtula mis-suldati Ingliżi. Dan il-monument kien ilu f’din il- pjazza (ara ritratt) minn Ġunju 1986 jiġifieri 24 sena.

Eżatt fl-inħawi tal-pjazza San Ġorġ (il- Main Guard) miet Lorenzo Dyer wieħed mil-vittmi ta’ dan l-episodju ikrah fl-istorja ta’ Malta. Kien għalhekk propju u eżatt li f’din il-pjazza ġie mwaqqaf dan il- monument li illum sfortunatament ġie mneħħi u mwarrab minn din il-pjazza, il- post naturali tiegħu.

Kont taħseb li dawn il-fatti kienu se jissemmew f’dan il-programm speċjali. Forsi ħasbu li aħna li ngħixu l-Awstralja ma nafux l-istorja? Ma jafux li f’Sydney niċċelebraw b‘solennità kull sena t-tifkira tas-Sette Guigno quddiem il-monument li għandha f’Pendle Hill, liema monument ġew iżuruħ kull politiku li ġie minn Malta

Ma nistgħax nifhem għaliex l-PBS (Malta) għandha tkun daqstant kattiva ma’ l-istorja ta’ Malta. Din mhix politika partiġġjana iżda l-istorja tagħna l-Maltin kollha. Dan suppost li hu l-istazzjoni nazzjonali mħallas mit-taxxi tal-kulħadd inklużi l-eluf ta’ Maltin-Awstraljani li jħallsu t-taxxa f’Malta għax għandhom flushom investiti f‘pajjiż twelidhom.

Nhar il-Ħadd 3 ta’ Jannar 2010, l-ewwel program tas-sena ma wasalx. Ġimgħa oħra nippubblika rapport sħiħ dwar dan in-nuqqas.


Fejn kien il-monument ftit mumenti biss wara li neħħewh.		Il-monument storiku tas-7 ta' Ġunju 1919

Is-sena li ħallejna warajna

Mhux ħaġa kbira li dawk l-affarijiet li huma importanti għalikom f’Malta mhux daqstant l-ewwel fil-lista tiegħi ta’ ġrajja importanti li ġraw fid-dinja. Ma hemmx dubju li għalija l-ikbar impatt tas-sena jekk mhux tas-seklu kien Barack Obama u l-elezzjoni tiegħu fil-24 ta’ Jannar 2009 bħala l-ewwel President (mhux ta’ nisel abjad) bħala l-44 President ta’ l-Amerika.

Qatt f’għomri ma stennejt li dan se jiġri fl- Amerika. Dan il-President ġab miegħu xmara ta’ tama b’politika b’direzzjoni differenti mhux biss għall-Amerika iżda mad-dinja kollha. Rajna wkoll it-tmiem ta’ l-eks President George W Bush, li ħalla warajh diżastru finanzjarju u gwerrer fl- Iraq u Afganistan u tmiem tat-tliet politiċi,

Mary MacKillop

Bush, Howard u Blair li daħħlu lid-dinja fi gwerra kiefra bla bżonn.

F’Malta kellna wkoll President ġdid bl- approvazzjoni taż-żewġ partiti. Dr George Abela fetaħ orizzonti ġodda u jidher li ġie aċċettat mhux iktar minn nofs il- popolazzjoni iżda mill-maġġoranza tal- Maltin.

Id-dinja kienet diżappuntata meta l-wisq mistennija konferenza dwar il-klima globali f’Copenhagan spiċċat x’aktar f’iktar divizzjoni bejn il-pajjiż maġġuri bħaċ-Ċina, l-Amerika u l-Indja biex issa iktar għandna persuni li huma xettiċi dwar dak li jidher ċar li hu taqlib serju fil-klima li se jkollu effett drammatiku jekk ma nagħmlu xejn immedjatament fuq il- ħajja jekk mhux tagħna iżda ta’ dawn li ġejjin warajna.

F’dawn in-naħat tad-dinja fejn it-temp donnu jidderieġi ħajjitna rajna l-agħar bushfires f’Melbourne fi Frar fejn mietu 173 persuna, korrew madwar 400 u madwar 2,000 dar sfaw meqruda.

Il-Partit Liberali Awstraljan kompla jixxengel mar-riħ meta warrab lil Malcolm Turnbull u ħatar lil Tony Abbott bħala mexxej minħabba kwistjonijiet serji dwar it-tibdil fil-klima. Fl-istat ta’ NSW kellna t-tielet Premier u l-ewwel mara Premier bil- ħatra f’Diċembru ta’ Kristina Keneally flok Nathan Rees.

Kellna wkoll l-aħbar ta’ l-ewwel qaddisa Awstraljana. I s-soru Mary MacKillop ġiet

Tony Abbott

iddikjarata qaddisa mill-Papa Benedittu. Ilha mejta 100 sena u għixet fis-seklu 19 fin-naħat ta’ South Australia. Fil-bidu tal- ħidma tagħha fost il-fqar u l-iżvantaġġjati kellha konflitti mal-knisja tant li ġiet skomunikata iżda wara l-knisja rat l-iżball li għamlet u rtirat l-iskomunika. Santa Mary MacKillop hija l-fundatriċi tas- sorijiet ta’ St Joseph.

Il-komunità Maltija fl-Awstralja laqgħet ukoll b’entużjażmu lill-President ta’ Malta, Dr Edward Fenech Adami (Kemm dam l-Awstralja qatt irrefera għal Malta bħala Repubblika). F’NSW kienet laqgħa straordinarja u rari fejn il-komunità ngħaqdet tassew flimkien biex organizzat riċeviment storiku f’ġih dan il-President u eks Prim Ministru Malti.

Temp tal-ġenn

Eżatt fl-ewwel jiem ta’ sena ġdida ftit kelli aptit nersaq lejn il-komputer biex insawwar artiklu ieħor u nkomplu fejn ħallejna s-sena l-oħra. Inħoss iżda li għandi nżomm il-konnessjoni ħajja bejn il-Maltin li jgħixu fl-Awstralja u inthom li għażiltu li tibqgħu fl-art twelledkom u dawk l-oħrajn imxerdin mad-dinja li jaqraw dawn l-artikli b’tant ħerqa.

Ftit ilu skantajt meta qrajt li xi ġurnalisti Maltin kienu qegħdin jipparagunaw it-temp ta’ Malta ma’ dak ta’ l-Awstralja tant li ħarġu jitfaħħru li Malta kellha “an Australian Christmas”. Tajjeb kieku għax l-Milied tagħkom huwa xitwi iżda tagħna suppost li jasal fis- sajf. B’dan kollu hawn fl-Awstralja ngħixu f’kontinent u jista’ jkollok għargħar u dulluvju f’naħa u sħana u bushfires f’naħa oħra fl- istess ħin.

Fejn noqgħod jien, fil-Punent ta’ Sydney kellna xita kważi kontinwa minn lejlet il-Milied sa Boxing Day u anke sa kemm qed nikteb dan l-artiklu ftit rajna xemx għalkemm għall-famuż logħob tan-nar fil-Port ta’ Sydney bejn il-Harbour Bridge u l-Opera House kellna lejn tassew eċċellenti. L-istat ta’ NSW kellna perjodi estremi. Waqt li l-bdiewa tat-Tramuntana kienu qed jiċċellebraw ix-xita qalila li ġabililhom wens minn nixfa qerrieda dawk li jgħixu fin-naħa t’isfel kienu qed jippreparaw biex jikkumbattu l-bushfires. Daqshekk ikollna temp estrem u għalhekk mhux eżatt li tiddeskrivi t-temp b’mod ġenerali fl-Awstralja, wisq iżjed tipparaġunah mal-gżejjer ċkejkna ta’ Malta.

Nixtieq lill-qarrejja kollha Sena Ġdida mimlija hena u paċi.
Il-pjaċir tiegħi li erġajna bdejna sena oħra flimkien.

Nieħdu gost jekk tibgħatuli aħbarijiet mill-komunità biex indaħħluhom f’din il-website li tmur mad-dinja kollha b’kalkolu ta’ madwar 1500 qarrejja fil-ġimgħa.
Ibgħatu lil lawdimech@optusnet.com.au

Jekk trid taqra l-artikli ta' dawn il-paġni li dehru qabel
Agħfas Hawn

VISIT DIPLOMAT HOTEL WEBSITE
CLICK HERE

Għal iktar aħbarijiet aqraw

toħroġ ma' l-Awstralja kollha
kull nhar ta' Tlieta

Kull ma' trid tkun taf fuq Malta

tektek hawn