Ahbarijiet mill-Awstralja

Aħbarijiet mill-Awstralja

ma' Lawrence Dimech OAM J.P.

Għal aktar aħbarijiet mill-Awstralja aqraw The Maltese Herald
li toħroġ fl-Awstralja kollha kull nhar ta' Tlieta.

It-Tnejn, 19 ta' Ottubru 2009

Nagħtu rigal xieraq lill-Papa meta jiġi Malta

Qegħdin isiru tentattivi biex il-Papa Benedittu XV1 jagħmel l-ewwel żjara tiegħu f’Malta u ħafna sforzi wkoll biex minflok f’April il-kap tal-Knisja Kattolika jżur żgiritna fid-9 ta’ Mejju biex ikun mall- poplu Malti meta dan ikun qiegħed jiċċelebra l-festa ta’ San Ġorġ Preca. Kien dan il-Papa ta’ nisel Ġermaniż li propju ddikjara lil Dun Ġorġ bħala qaddis nhar f’Ġunju 2007 fil-Vatikan.

Qegħdin isiru sforzi kbar biex il-Papa jibdel l-itinerarju tiegħu u jasal Malta għal festa ta’ Dun Ġorġ. Fis-sena 2007 kienet saret ukoll talba lill-Vatikan biex Dun Ġorġ jiġi ddikjarat qaddis f’Malta stess iżda din it-talba ma seħħitx.

Jidher li aħna l-Maltin dejjem nittallbu u f’ħafna drabi dan nagħmluh għall-aħjar iżda din id-darba għandna flok nittallbu nieħdu deċiżjoni aħna u nuru mhux biss lill-Papa Benedittu iżda lid-dinja kollha kemm tassew aħna kburin bl-ewwel qaddis Malta. Niftakru kemm is-seklu domna nistennew biex fl-aħħar irnexxilna jkollna qaddis ta’ nisel Malti.

Nuru lid-dinja li mhux biss bil-paroli iżda bl-imħabba tagħna lejn dan il-Malti rridu nsarrfuha b’tifkira li tibqa’ quddiem kulħadd f’monument ħaj.

Dan in-nhar li jasal il-Papa f’Malta kemm jekk jasal f’Mejju jew f’April, għandna niddikjaraw li se nsemmu l-isptar il-ġdid li tawh l-isem ta’ Mater Dei bħala l-Isptar San Ġorġ Preca.

Kemm tkun okkażjoni f’waqtha. Kemm tassew nuru l-imħabba tagħna għal dan l- ewwel u l-uniku qaddis Malti. Ma għandniex xi tużżana minnhom u għalhekk mhux se noffendu lil ħadd waqt li Omm Alla għandha għexrien ta’ monumenti f’Malta msejjħa għaliha taħt il-ħafna ismijiet li jonorawha bihom.

L-idea li l-isptar il-ġdid f’tal-Qroqq jiġi msemmi għal dan l-ewwel qaddis Malti kont għamiltha f’Mejju 31, 2007 fil-ġurnali ta’ Malta u anke fuq l-internet. Ir- reazzjoni kienet waħda li skantatni iżda fl-istess ħin is-skiet minn naħat li misshom ħarġu jgħollu leħinhom u jagħtu

Il-bust ta' San Ġorġ Preca
f'St Patrick's Cathedral ta' Melbourne

l-appoġġ tagħhom kien, kif jgħidu jtarxek. Forsi għax Malta xejn ma hu abjad u iswed.

Din hija deċiżjoni li ma għandiex bżonn l- approvazzjoni tal-Vatikan, tal-Papa jew xi istituzzjoni oħra. Hi deċiżjoni li nistgħu nieħdu aħna l-Maltin, deċiżjoni li għandha tgħaqqad lill-poplu Kattoliku Malti li tant feraħ, iċċelebra u bl-ikbar qima u solennità għolla lil Dun Ġorġ fuq l-ogħla pedestal tal-Knisja tant għażiża tagħna l- Maltin.

Dan hu l-ikbar rigal li nistgħu nagħtu lil Papa bħala ringrazzjament li tana l- ewwel qaddis Malti. Mur ara kemm jieħu gost il-Papa meta jasal fl-ajruport ta’ Malta u forsi wkoll ibus l-art kif kien jagħmel ta’ qablu, ngħidulu li se nsemmu l-ikbar u l-aħjar sptar li qatt kellha Malta għal San Ġorġ Preca.

L-istorja moħbija tal-gays f’Malta

L-avukat Joseph Chetcuti huwa magħruf sewwa għall-attivitajiet tiegħu mal-gays kemm fl-Awstralja u anke f’Malta. Huwa kiteb l-ewwel ktieb bil-Malti dwar l- omosesswalità bl-isem ta’ The Pink Book. Issa kiteb ktieb ieħor Queer Mediterranean Memories fejn jidħol sewwa fl-istorja tal-gays u kif kienu jaħdmu fl-antik minn taħt kif ukoll dwar l-attentati tagħhom fil-preżent biex jakkwistaw ugwalità fis-soċjetà.

Queer Mediterranean Memories ġie deskritt f’artiklu li deher fil-MCV Insight bħala storja mżewwqa b’numru ta’ artikli li jġgħaluk tispekola dwar il-ħajja moħbija ta’ għadd ta’ personalitajiet magħrufa Maltin. Il-ktieb huwa wkoll gwida dwar il-kultura Maltija hekk magħrufa bħala “camp”.

Dan l-avukat minn Melbourne, iben il-mejjet poeta Ġorġ Chetcuti fil-ktieb tiegħu jipponta subgħajh lejn ħafna persuni prominenti kemm ta’ nisel Malti u anke dawk Ingliżi li kellhom konnessjoni ma’ Malta u jgħid li setgħu kienu gays. L-awtur ma jeskludi lil ħadd u jsemmi ismijiet ta’ qaddisin, nies sinjuri u ta’ negozju, saċerdoti u anke politiċi.

L-avukat Chetcuti jinnota wkoll li għalkemm Malta daħlet membru tal-EU fl-2004 xi liġijiet Maltin dwar l-omosesswalità jistgħu jmorru kontra l-konvenzjoni internazzjonali. Il-ktieb fih ħafna ritratti sa anke parti fejn jgħid kif jitkellmu bil-Malti il-gays. L-istoriku Dr Graham Willett li kiteb l-introduzzjoni tal-ktieb stqarr li x-xogħol ta l-avukat Chetcuti huma “passion & scholarship”. Għal iktar tagħrif tektek www.queermalta.com.

L-avukat Joseph Chetcuti

Donazzjonijiet għall-Monument Anzacs

Saru diversi għotjiet għat-twaqqif tal- Monument f’ġieħ l-ANZACS li huwa ppjanata għall-Ġnien ta’ l-Argotti l- Furjana.

Fost dawn l-għotjiet kien hemm dik tal- Maltese Community Council ta’ NSW. Il- preżentazzjoni ta’ din id-donazzjoni saret lill-Kumitat tal-Anzacs Memorial mill-Viċi President tal-Maltese Community Council of NSW, Lawrence Dimech.

Min-naħa tagħhom is-sur Charles Mifsud u s-sur Victor Buttigieg, President u Kaxxier tal-Maltese Cultural Association ta’ NSW ippreżentaw donazzjoni wkoll f’isem l-Għaqda tagħhom.

Għal dawn il-preżentazzjonijiet kien hemm ukoll preżenti s-Sinjura Marlene Dimech li hija membru tal-Kunsill u l- Għaqda Kulturali. Dawn il- preżentazzjonijiet saru fil-każin tal-British Legion fil-belt Valletta ftit ġimgħa ilu.

Sadanittant, barra għotjiet oħra, il- Kumitat ta’ l-Anzacs Memorial, irċeviet ukoll is-somma ta’ $A2040 mill-Maltese Association of West Australia Inc. Fir- ritratt jidher il-President tal-Maltese- Australian Association, Nicholas Bonello

OAM u Lawrence Dimech bil-wieqfa. Mix- xellug jidhru Victor Buttigieg, Charles u Jessie Mifsud u Marlene Dimech waqt il- Preżentazzjoni tal-għotjiet għall- Monument Anzacs fil-British Legion Club Triq Melita fil-belt Valletta.

Għalqet 70 sena

Kienet sorpriża kbira meta Lucy Stewart, il-President tal-Maltese Australian Association ta’ Queensland attendiet għas-soltu laqgħa ta’ kull xahar li tieħu forma ta’ piknik. Mingħajr ma qalulha xejn il-kumitat organizza ikla fl-okkażjoni ta’ l-għeluq it-70 sena mit-twelid tagħha. Membri tal-famalja tagħha attendew flimkien ma’ numru sabiħ ta’ membri antiki biex barra li jiċċelebraw għeluq żmienha jirringrazzjawha għax-xogħol fejjiedi tagħha fost il-komunità Maltija tan-naħat ta’ Brisbane. Inqrat ukoll ittra mill- Kummissarju Għoli għal Malta fl-Awstralja, l-ET Francis Tabone fejn ferħilha u xtaqilha għomor twil. Ingħataw wkoll xi rigali.


Il-grupp li ltaqgħu biex jifirħu lil Lucy Steward fi Brisbane		Lucy Steward (lemin) u Margaret Fenech

Nieħdu gost jekk tibgħatuli aħbarijiet mill-komunità biex indaħħluhom f’din il-website li tmur mad-dinja kollha b’kalkolu ta’ madwar 1500 qarrejja fil-ġimgħa.
Ibgħatu lil lawdimech@optusnet.com.au

Jekk trid taqra l-artikli ta' dawn il-paġni li dehru qabel
Agħfas Hawn

VISIT DIPLOMAT HOTEL WEBSITE
CLICK HERE

Għal iktar aħbarijiet aqraw

toħroġ ma' l-Awstralja kollha
kull nhar ta' Tlieta

Kull ma' trid tkun taf fuq Malta

tektek hawn